Бараа, бүтээгдэхүүн тогтмол нийлүүлэх болон ажил, үйлчилгээг тогтмол явуулах тухай гэрээний стандарт нөхцөлд гэрээг цуцлах санал гаргаагүй тохиолдолд гэрээг тухай бүр нэг жилээс урт хугацаагаар сунгасанд тооцохоор тогтоосон байна. Энэ нь хүчин төгөлдөр үү?

Иргэний эрх зүйн харилцаанд стандарт нөхцөл бүхий гэрээ байгуулахдаа нөгөө талын эрх, хууль ёсны ашиг сонирхлыг үндэслэлгүйгээр хязгаарлахыг хориглодог ерөнхий зарчим үйлчилдэг.

Бараа, бүтээгдэхүүн тогтмол нийлүүлэх болон ажил, үйлчилгээ тогтмол үзүүлэх гэрээнд талууд гэрээг цуцлах санал гаргаагүйгээс шалтгаалан гэрээг автоматаар нэг жилээс урт хугацаагаар сунгагдахаар заасан нь гэрээний нөгөө талыг хэт урт хугацаагаар хүлэгдмэл байдалд оруулж, гэрээг чөлөөтэй дуусгавар болгох эрхийг хязгаарласан шударга бус нөхцөл болдог.

Иймд гэрээний сул дорой талын эрх ашгийг хамгаалах зарчмын үүднээс стандарт нөхцөл дэх уг заалт нь хүчин төгөлдөр бус байна.