Иргэн А нь Замын-Үүдэд гаалийн мэдүүлэг хийхдээ гаалийн байцаагч Б-ээс зөвлөгөө авах гэсэн боловч байцаагч түүнд “би танд зөвлөгөө өгөх үүрэггүй” гэж хэлээд яваад өгчээ. Б-ийн энэ хандлага нь А-ын дургүйг их хүргэсэн тул эрх бүхий этгээдэд нь гомдол гаргаж хариуцлага тооцуулья гэж шийдсэн. Тэрээр хаана гомдол гаргах вэ?

Гаалийн тухай хуулийн 12 дугаар зүйлийн 12.1 дэх хэсэг болон 16, 17 дугаар зүйлд гаалийн хууль тогтоомжийн хүрээнд мэдээлэл, зөвлөгөө өгөхтэй холбогдсон харилцааг зохицуулсан байдаг. Гаалийн байцаагч нь тухайн нөхцөлд иргэнд биечлэн гаалийн мэдүүлэг нөхөн бичих талаар зөвлөгөө өгөх хуулиар хүлээсэн шууд үүрэггүй бөгөөд татгалзсан нь хууль ёсны үйлдэл юм.

Түүнчлэн гаалийн байцаагч Б нь иргэн А-ын эрх, хууль ёсны ашиг сонирхлыг хөндсөн ямар нэгэн захиргааны шийдвэр гаргаагүй тул хуульд заасан журмын дагуу гомдол гаргах үндэслэл, урьдчилсан нөхцөл бүрдээгүй байна.

Иймд Б-ийн татгалзал нь хууль зөрчөөгүй бөгөөд ямар нэгэн эрх зүйн үр дагавар бүхий шийдвэр гаргаагүй тул иргэн А хаана ч гомдол гаргах боломжгүй гэсэн хариулт зөв болно.