Нийслэлийн Засаг даргаас зуслангийн замыг засах шийдвэр гаргасантай холбоотойгоор замын ойролцоо айлуудыг албадан нүүлгэх шийдвэр гаргажээ. Энэ шийдвэр нь захиргааны шийдвэр гүйцэтгэлийн албадлагын аль хэлбэрт хамаарах вэ?

Захиргааны ерөнхий хуульд зааснаар захиргааны актыг сайн дураар биелүүлээгүй тохиолдолд захиргааны байгууллагаас шийдвэр гүйцэтгэлийн албадлагын арга хэмжээг хэрэглэдэг.

Зөвхөн тухайн үүрэг хүлээгч өөрөө биечлэн гүйцэтгэх боломжтой буюу бусдаар орлуулан хийлгэх боломжгүй тодорхой үйлдлийг хийлгэх, эсхүл эс үйлдэхүйг хангуулахад чиглэсэн арга хэмжээг албадан гүйцэтгэх хэлбэрт хамааруулдаг.

Иймд замын трасст орсон айлуудыг албадан нүүлгэх нь тухайн иргэд, оршин суугчдын биечлэн гүйцэтгэх үүргийг төрийн хүчээр албадан хангуулж буй үйл ажиллагаа тул албадан гүйцэтгэх арга хэмжээ болно.