“Үндэсний дэглэм” гэж худалдааны ямар зарчмыг хэлэх вэ?

Олон улсын худалдааны эрх зүйд "Үндэсний дэглэм" (National Treatment) нь гадаадын бараа, үйлчилгээ болон оюуны өмчийг тухайн улсын зах зээлд нэвтэрсний дараа дотоодын ижил төрлийн бараа, бүтээгдэхүүнтэй адил тэгш нөхцөлөөр авч үзэх үндсэн зарчим юм.

Энэхүү зарчмын гол зорилго нь дотоодын зах зээл дээр гадаадын болон дотоодын үйлдвэрлэгчдийн бараа, бүтээгдэхүүнд ялгаваргүй хандаж, тэдэнд худалдаа, борлуулалтын ижил тэгш, шударга өрсөлдөх нөхцөлийг бүрдүүлэхэд оршдог.

Иймд импортын бараанд дотоодын бараанаас илүү татвар ногдуулах, эсхүл худалдааны бус нэмэлт хориг саад тавих замаар дотоодын үйлдвэрлэгчдийг илтэд дэмжихийг хориглож, өрсөлдөх тэгш боломжийг хангасан байхыг үндэсний дэглэм гэнэ.