Анхан шатны шүүх хуралдааны товыг хариуцагч Б-д хүргүүлэхээр шуудангаар мэдэгдэх хуудсыг явуулсан. Шуудангаас уг мэдэгдэх хуудсыг хүргүүлэх боломжгүй гэж бичиж шүүхэд буцаагаар хүргүүлсэн байна. Анхан шатны шүүх хуралдаанд хариуцагч Б-г оролцуулаагүй. Хариуцагч Б давж заалдах шатны шүүхэд гаргасан гомдолдоо “анхан шатны шүүх хуралдаанд оролцох эрхийг зөрчсөн” гэжээ. Дараахь хариултын аль нь хуульд нийцэх вэ?

Хэргийн оролцогчид шүүх хуралдааны товыг мэдэгдэх хуудсаар албан ёсоор хүргүүлж, түүнийг гардан авсан эсэхийг баталгаажуулсан байх шаардлагатай. Шүүх хуралдааны мэдэгдэх хуудас хүргэгдээгүй, шуудангаас буцаж ирсэн тохиолдолд хариуцагчийг шүүх хуралдааны товыг хуульд заасан журмын дагуу мэдсэн гэж үзэх үндэслэлгүй юм.

Иймд шүүх хуралдааны товыг зохих ёсоор мэдэгдээгүй атлаа хариуцагчийг оролцуулахгүйгээр хэргийг хянан шийдвэрлэсэн нь хэргийн оролцогчийн хуралдаанд биечлэн оролцох, мэтгэлцэх эрхийг хязгаарласан хэрэг хянан шийдвэрлэх ажиллагааны ноцтой зөрчил болно.