“К” компанийн бариулж буй орон сууцны хотхон, түүний барилга байгууламжийн зураг төслийг архитектурч А нь гэрээнд заасны дагуу 300.0 сая төгрөгөөр боловсруулан өгчээ. “К” компани 300.0 сая төгрөгтөө 3 өрөө орон сууц тооцож авахыг санал болгосныг А зөвшөөрсөн бол талуудын хооронд ямар гэрээ байгуулагдсан бэ?

Энэхүү тохиолдолд талуудын хооронд барилга байгууламжийн зураг төсөл боловсруулах үүрэг үүссэн нь тодорхой ажлын үр дүнг бий болгох шинжтэй тул Иргэний хуульд заасан ажил гүйцэтгэх гэрээний шинжийг агуулж байна.

Мөн гүйцэтгэсэн ажлын хөлсийг мөнгөн хэлбэрээр бус, хариу төлбөр болгон гурван өрөө орон сууцны өмчлөлийг шилжүүлж тооцохоор харилцан тохиролцсон нь эд хөрөнгийг өөр эд хөрөнгө, эрхээр харилцан солилцох арилжааны гэрээний шинжийг хангаж байна.

Иймд уг хэлцэл нь бие даасан хоёр өөр төрлийн гэрээний гол нөхцөл, элементүүдийг нэгтгэн агуулсан тул ажил гүйцэтгэх болон арилжааны гэрээний аль аль шинжийг агуулсан холимог гэрээ болно.