Г согтууруулах ундааны зүйл хэрэглэсэн үедээ найз Ж-тэй маргалдаж толгойн хойд хэсэг рүү нь гараараа нэг удаа хүчтэй цохижээ. Хэсэг хугацааны дараа Х ирж Ж-г “архи өгсөнгүй” гэх шалтгаанаар толгойн баруун тал руу нь гараараа нэг удаа хүчтэй цохиход Ж хэсэг хугацааны дараа ухаан алдан эмнэлэгт хүргэгдэн, гавал тархины битүү гэмтлийн улмаас нас барсан байна. Мөрдөн шалгах ажиллагааны явцад шинжээч эмчийн дүгнэлтээр “Ж-д учирсан гавал тархины битүү гэмтэл нь мохоо зүйлийн нэг болон хэд хэдэн удаагийн үйлчлэлээр үүсэх боломжтой бөгөөд Г, Х нарын хэний үйлдлээс болж учирсан болохыг нарийн тогтоох боломжгүй” гэсэн байна. Г болон Х нар нь:

Энэ тохиолдолд Г, Х нар нь хохирогч Ж-г хамтран зодох талаар урьдчилан үгсэн тохиролцоогүй бөгөөд бие даасан сэдэлтээр, өөр өөр цаг хугацаанд тус тусдаа хүч хэрэглэсэн байна. Иймээс тэдний үйлдэл нь бүлэглэн гүйцэтгэсэн шинжгүй, бие даасан шинжтэй байна.

Шинжээчийн дүгнэлтээр хохирогчид учирсан үхэлд хүргэсэн гавал тархины битүү гэмтэл нь тэдний хэнийх нь цохилтоос шалтгаалсныг нарийн тогтоох боломжгүй гэж үзсэн тул гэм буруугүйн зарчим болон эргэлзээг шүүгдэгчид ашигтайгаар шийдвэрлэх зарчмыг баримтална. Өөрөөр хэлбэл, үхлийн шалтгаант холбоо аль нэгэнд нь тодорхой тогтоогдоогүй тул үхэлд хүргэсэн гэж хүндрүүлэн зүйлчлэх боломжгүй юм.

Иймд Г, Х нар нь хүний амин чухал эрхтэн болох толгой руу хүчтэй цохиж, хохирол учруулсан өөрсдийн бодит үйлдлийн хүрээнд тус бүр хүний эрүүл мэндэд хүнд хохирол санаатай учруулах гэмт хэрэгт эрүүгийн хариуцлага хүлээх үндэслэлтэй.