Д нь гэрт хууль бусаар нэвтэрч 5.0 сая төгрөгийн үнэтэй мана хөөргийг нь нууцаар авч, гэрээс нь гарсан боловч хашааных нь үүдэнд гэрийн эзэн А-тай халз тулгарсан, энэ үед А түүнийг барьж авсан боловч А-г зодож, газарт унагааж, улмаар зугтаасан байна. Хэргийн зүйлчлэлд хамаарах зөв хариултыг сонгоно уу?

Эрүүгийн эрх зүйн онол болон хуулийн зохицуулалтаар хулгайлах гэмт хэрэг үйлдэж эхэлсэн этгээд эд хөрөнгийг бүрэн захиран зарцуулах боломж бүрдэхээс өмнө бусдад илчлэгдэж, улмаар тухайн эд хөрөнгийг өөртөө авч үлдэх, авч зугтах зорилгоор бусдын амь нас, эрүүл мэндэд хүч хэрэглэсэн бол уг үйлдэл нь дээрэмдэх гэмт хэрэгт шилждэг.

Энэ тохиолдолд Д нь бусдын эд хөрөнгийг нууцаар авч гарсан боловч хашаанаас гарч амжаагүй, тухайн эд хөрөнгийг захиран зарцуулах бодит боломж бүрдээгүй байхдаа хохирогчид баригдсан байна.

Улмаар эд хөрөнгийг авч зугтахын тулд эзэмшигчийг зодож хүч хэрэглэсэн нь хулгайн үйлдэл хүч хэрэглэсэн шинж рүү шилжиж, бүхэлдээ "Хүч хэрэглэж дээрэмдэх гэмт хэрэг"-ийн бүрэлдэхүүнийг хангаж байна.