Уул уурхай, хүнд үйлдвэрийн яам болон гадаадын хөрөнгө оруулалттай “В” ХХК Газрын тосны бүтээгдэхүүн хуваах гэрээг байгуулжээ. Гэрээг хэрэгжүүлэх явцад Уул уурхай, хүнд үйлдвэрийн яамнаас “цаашид танай байгууллагатай хамтран ажиллах боломжгүй талаар Засгийн газраас чиглэл ирсэн тул гэрээг цуцлах болсныг мэдэгдье” гэсэн тоот иржээ. Хууль зүйн хувьд боломжтой юу?

Захиргааны ерөнхий хуулийн 56 дугаар зүйлд захиргааны гэрээг цуцлах үндэслэл, журмыг зохицуулсан байдаг. Төрийн захиргааны төв байгууллага болон хувийн хуулийн этгээдийн хооронд байгуулсан энэхүү гэрээ нь захиргааны гэрээний шинжийг агуулж байна.

Захиргааны гэрээг захиргааны байгууллага өөрийн санаачилгаар дур мэдэн, хүндэтгэн үзэх хууль зүйн үндэслэлгүйгээр дангаар цуцлах боломжгүй юм. Захиргааны байгууллагын санаачилгаар гэрээг дангаар цуцлах зохицуулалт нь нийтийн ашиг сонирхолд ноцтой хор уршиг учруулахаас урьдчилан сэргийлэх, түүнийг арилгах зайлшгүй шаардлага бий болсон онцгой тохиолдолд л хэрэгждэг.

Иймд Засгийн газраас зөвхөн хамтран ажиллах боломжгүй гэсэн чиглэл өгсөн нь нийтийн ашиг сонирхолд ноцтой хор уршиг учирсан тухай хуулийн урьдчилсан нөхцөлийг хангахгүй тул гэрээг шууд цуцлах нь хууль зүйн хувьд боломжгүй юм.