Х нь архи согтууруулах ундааны зүйл хэрэглэсэн үедээ найз Б-тай маргалдаж харилцан зодолдож, улмаар газраас архины шилийг шүүрч аван хохирогчийн зүүн гуя тус газарт цохиж дунд чөмгөний ясны ил хугарал гэмтэл учруулжээ. Х-ын үйлдэл нь:

Х-ын үйлдэл нь хүний эрүүл мэндэд хүнд хохирол санаатай учруулах гэмт хэргийн ердийн бүрэлдэхүүний шинжийг бүрэн хангаж байна. Хохирогчийн дунд чөмгөний яс ил хугарсан нь гэмтлийн зэрэг тогтоох журмаар хүний эрүүл мэндэд учирсан "хүнд" зэргийн хохиролд хамаарна.

Эрүүгийн хуульд заасан "зэвсэг, тусгайлан бэлтгэсэн зэвсгийн чанартай зүйл" гэдэг ойлголтод халдлага үйлдэх зорилгоор урьдчилан бэлтгэсэн, зассан эд зүйлийг ойлгодог. Энэ тохиолдолд Х нь урьдчилсан зорилго, бэлтгэлгүйгээр, харилцан зодолдох явцдаа газраас архины шил шүүрэн авч цохисон тул хүндрүүлэх бүрэлдэхүүний шинжгүй гэж үзнэ.

Мөн гэмт этгээд хүний амин чухал эрхтэн рүү бус гуя руу нь цохисон, амь насыг нь хохироох санаа зорилго, сэдэл хангалттай тогтоогдоогүй тул хүнийг алах гэмт хэрэгт завдсан гэж үзэх үндэслэлгүй бөгөөд ердийн бүрэлдэхүүнтэй хүний эрүүл мэндэд хүнд хохирол санаатай учруулах гэмт хэрэг болно.