Ц нь найз охин С-гийн хамт согтууруулах ундааны зүйл хэрэглэсэн үедээ маргалдаж түүний толгой тус газарт нь шилэн аягаар цохиж толгойн хуйханд язарсан шарх бүхий гэмтэл учруулжээ. Хөрш айлын эмэгтэй тэднийг маргалдахыг сонсоод хаалгыг нь тогшиж ороход С- гийн толгойноос цус ихээр алдаж байсан тул түргэн дуудах гэхэд нь Ц асуудалд орохоос айж “шаардлагагүй, жижиг шарх учир бид хоёр өөрсдөө боолт хийчихнэ” гэж хэлээд гэрээсээ гаргасан. Ийнхүү Ц хохирогчид зохих эмнэлгийн тусламж үйлчилгээг үзүүлэхгүй байлгасаар цус ихээр алдаж С нас барсан байна. Мөрдөн шалгах ажиллагааны явцад шинжээч эмчийн дүгнэлтээр “толгойн хуйханд язарсан шарх бүхий гэмтэл нь гэмтлийн хөнгөн зэрэгт хамаарна, согтууруулах ундааны зүйл хэрэглэсэн байсан нь хохирогчийг богино хугацаанд цус ихээр алдахад хүргэсэн” болох нь тогтоогджээ. Ц-ийн үйлдэл нь:

Ц нь С-ийн толгой тус газарт шилэн аягаар цохиж, эрүүл мэндэд нь хөнгөн зэргийн гэмтэл учруулсан үйлдэл нь хүний эрүүл мэндэд хөнгөн хохирол учруулах гэмт хэргийн шинжийг бүрэн хангаж байна.

Мөн өөрийнх нь үйлдлийн улмаас хохирогч цус ихээр алдаж, амь насанд нь аюултай нөхцөл байдал бий болсныг мэдсээр байж түргэн тусламж дуудуулалгүй хөндлөнгийн тусламжийг хязгаарлаж, өөрөө ч шаардлагатай тусламжийг үзүүлээгүй эс үйлдэхүй гаргасан. Ингэж амь насанд нь аюул учирсан хүнийг аюултай байдалд зориуд орхиж, тусламж үзүүлээгүй нь уг хэргийг давхар зүйлчлэх үндэслэл болно.

Шинжээчийн дүгнэлтээр шууд учруулсан гэмтэл нь хөнгөн зэрэгт хамаарч байгаа боловч шаардлагатай тусламжийг үзүүлээгүй эс үйлдэхүйн улмаас хохирогч нас барсан тул Эрүүгийн хуульд заасан хүний эрүүл мэндэд хөнгөн хохирол учруулах болон аюултай байдалд орхих, тусламж үзүүлэхгүй байх гэмт хэргүүдийн шинжээр хамтатган зүйлчлэх нь зөв юм.