О,П нар нь гэрлэхийг хүссэн бөгөөд эмнэлгийн байгууллагаас П-г “дархлалын олдмол хомсдол” өвчтэй болохыг шинжилгээгээр тогтоожээ. Уг шинжилгээний хариуг үндэслэн гэрлэлтийг бүртгээгүй тул O, П нар шүүхэд хандаж, улсын бүртгэлийн байгууллагад гэрлэлтийг бүртгэхийг даалгаж өгнө үү гэсэн нэхэмжлэл гаргасан байна. Шүүх О, П нарын нэхэмжлэлийг хангах үндэслэлтэй юу?

Гэр бүлийн тухай хуулийн 9 дүгээр зүйлийн 9.1 дэх хэсэгт гэрлэхэд харшлах шалтгааныг тодорхой хуульчилсан байдаг бөгөөд тухайн жагсаалтад өвчний улмаас, түүний дотор дархлалын олдмол хомсдолтой байх нь гэрлэлт бүртгэхээс татгалзах үндэслэл болохоор тусгагдаагүй болно.

Түүнчлэн мөн хуулийн 8 дугаар зүйлийн 8.2 дахь хэсэгт зааснаар гэрлэгчид нь бие биеийнхээ эрүүл мэндийн байдлыг харилцан мэдэх эрхтэй бөгөөд эрүүл мэндийн байдал нь гэрлэхэд харшлах шалтгаан болохгүй тул шүүх нэхэмжлэлийг хангах үндэслэлтэй юм.