Засаг даргын Тамгын газарт нягтлан ажилтай Г нь У хуулийн этгээдийг газрын төлбөрөө төлөхийг шаардсан бөгөөд У хуулийн этгээдийн зүгээс газрын төлбөрийг хуульд заасны дагуу төлжээ. Гэвч хэсэг хугацааны дараа нягтлан Г Засаг даргын захирамжаар танай газар эзэмших эрхийг хүчингүй болгосон байжээ хэмээн уучлалт хүсэж төлбөрийг буцаан шилжүүлжээ. Энэ тохиолдолд захиргаа ямар зарчим зөрчсөн байж болох вэ?

Захиргааны ерөнхий хуульд зааснаар захиргааны байгууллагаас эрх зүйн үйлчлэл чиглэж буй этгээдийн эрх, хууль ёсны ашиг сонирхлыг хөндсөн, сөрөг нөлөө бүхий захиргааны акт гаргахын өмнө түүнд урьдчилан мэдэгдэж, тайлбар, санал гаргах боломжийг олгох үүрэгтэй.

Энэ тохиолдолд Засаг дарга нь "У" хуулийн этгээдийн газар эзэмших эрхийг хүчингүй болгох шийдвэр гаргахдаа тухайн этгээдэд урьдчилан мэдэгдээгүй, сонсох ажиллагаа явуулаагүйгээс гадна захиргааны байгууллагын ажилтан өөрөө өмнөх шийдвэрийг мэдээгүй байсан нь уг урьдчилан мэдэгдэх үүрэг, зарчмыг зөрчсөнийг харуулж байна.

Иймд эрх хүлээн авагчийн эрхийг хязгаарласан шийдвэрийг урьдчилан танилцуулж, мэдэгдэх ажиллагааг хэрэгжүүлээгүй тул захиргаа урьдчилан мэдэгдэх зарчмыг зөрчсөн гэж үзнэ.