Х нь багын найз болох Э-г мансууруулах эм, сэтгэцэд нөлөөт бодис бусдад худалдаж мөнгө олдог болохыг мэддэг бөгөөд нэгэн өдөр Э- гийн гэрт хамт байхдаа хувцасны шүүгээндээ нуусан байсан 15 грамм “мөс” нэршилтэй метафетаминий төрлийн бодисыг Э-д мэдэгдэлгүйгээр нууцаар авчээ. Х-ийн үйлдэл нь:

Мансууруулах эм, сэтгэцэд нөлөөт бодис нь иргэний эргэлтээс хасагдсан эсхүл хязгаарлагдсан тусгай төрлийн зүйл бөгөөд тэдгээрийг хууль бусаар олж авах, хадгалах, тээвэрлэх зэрэг үйлдлийг Эрүүгийн хуулиар мансууруулах эм, сэтгэцэд нөлөөт бодисыг хууль бусаар ашиглах гэмт хэрэг гэж тодорхойлдог.

Энэ тохиолдолд Х нь Э-гийн эзэмшилд байсан "мөс" нэршилтэй сэтгэцэд нөлөөт бодисыг түүнд мэдэгдэлгүйгээр авч байгаа нь тухайн хориотой бодисыг хууль бусаар өөрийн мэдэлд оруулж, олж авч буй үйлдэл юм. Гэмт этгээдийн өмчлөл, эзэмшилд байх эрхгүй хориотой зүйлийг бусдаас хулгайлж буюу нууцаар авсан ч энэ нь энгийн өмчлөх эрхийн эсрэг гэмт хэрэг биш, харин мансууруулах эм, сэтгэцэд нөлөөт бодисын эргэлтэд хяналт тавих нийгмийн аюулгүй байдлын эсрэг чиглэсэн гэмт хэрэг болно.

Иймд Х-ийн сэтгэцэд нөлөөлөх бодисыг нууцаар авч өөрийн эзэмшилд шилжүүлсэн үйлдэл нь Эрүүгийн хуульд заасан мансууруулах эм, сэтгэцэд нөлөөт бодисыг хууль бусаар ашиглах гэмт хэргийн шинжийг бүрэн хангаж байна.