Анхан шатны шүүхэд иргэн А-гийн нэхэмжлэлтэй хариуцагч Б-д холбогдох гэрлэлт цуцлуулах, хүүхдийн асрамж тогтоолгох тухай хэрэг хянагдаж байна. Анхан шатны шүүх хуралдааныг 2 дахь удаагаа товлон зарлажээ. Нэхэмжлэгч А нь хүндэтгэн үзэх шалтгаанаар өөрийгөө байхгүйд хэргийг шийдвэрлэх тухай хүсэлтийг гаргасан. Хариуцагч Б шүүх хуралдаанд хүндэтгэн үзэх шалтгаангүйгээр ирээгүй байна. Шүүхээс ямар шийдвэр гаргах вэ?

Иргэний хэрэг шүүхэд хянан шийдвэрлэх ажиллагаанд нэхэмжлэгч хүндэтгэн үзэх шалтгааны улмаас шүүх хуралдаанд биечлэн оролцох боломжгүй болж, өөрийнхөө эзгүйд хэргийг хянан шийдвэрлүүлэх тухай хүсэлт гаргасан тохиолдолд шүүх түүний хүсэлтийг үндэслэн хуралдааныг явуулах боломжтой.

Түүнчлэн, товлон зарласан шүүх хуралдааны товыг зохих ёсоор мэдсэн хариуцагч хүндэтгэн үзэх шалтгаангүйгээр ирээгүй, нэхэмжлэгчээс хэргийг түүний эзгүйд шийдвэрлүүлэх хүсэлт гаргасан нөхцөлд шүүх хэрэгт цугларсан нотлох баримтын хүрээнд шүүх хуралдаанаар нэхэмжлэлийг хянан шийдвэрлэдэг зарчимтай.