2008 онд Монгол Улсын Олон улсын гэрээ болон олон улсын эрх зүйн нийтээр хүлээн зөвшөөрсөн хэм хэмжээ, зарчмыг шүүхийн практикт хэрэглэх тухай Монгол Улсын дээд шүүхийн тогтоол гаргасан байдаг. Уг тогтоолд Олон улсын гэрээг тайлбарлахад Олон улсын гэрээний эрх зүйн тухай Конвенцын зохицуулалтыг шүүхүүд баримтлахаар заасан байна. Хэрэв албан ёсоор шүүх олон улсын гэрээг тайлбарласан бол энэ нь албан ёсны олон улсын тайлбарлалт(интерпретац)-ад тооцогдох уу?

Үндэсний шүүх олон улсын гэрээг хэрэглэх явцдаа өөрийн бүрэн эрхийн хүрээнд албан ёсны тайлбар хийх эрхтэй боловч энэ нь тухайн улсын дотоодын эрх зүйн хүрээнд л заавал биелэгдэх шинжтэй байдаг. Үндэсний шүүхийн шийдвэр, тайлбар нь зөвхөн тухайн улсын харьяаллын хүрээнд үйлчлэх тул олон улсын түвшинд шууд заавал дагаж мөрдөх хүчин чадалгүй юм.

Олон улсын гэрээг олон улсын нийтийн эрх зүйн хүрээнд албан ёсоор, нийтлэг байдлаар тайлбарлах эрх нь гэрээнд оролцогч талуудын харилцан тохиролцоо эсвэл олон улсын эрх бүхий шүүх, арбитрын байгууллагад хадгалагддаг. Тиймээс аль нэг улсын дотоодын шүүхээс гаргасан тайлбар нь хичнээн албан ёсны байсан ч олон улсын гэрээний бусад талуудад эрх зүйн хувьд үүрэг хүлээлгэхгүй бөгөөд тэдэнд шууд хамаарахгүй.