“LU” ХХК-ийн эд хөрөнгөнд дампуурлын хэрэг үүсгэхээс гурван сарын өмнө компани өөрийн ашиг орлогыг нэмэгдүүлэх зорилгоор ашигтай барилгын төсөлд 300.0 сая төгрөгийн хөрөнгө оруулалт хийх тухай гэрээнд гарын үсэг зурсан байжээ. Дампуурлын хэрэг үүсгэсний дараа Нэхэмжлэгчдийн зөвлөлөөс энэ гэрээг цуцлах тухай хүсэлтийг шүүхэд гаргасан байна. Нэхэмжлэгчдийн зөвлөлийн хүсэлт үндэслэлтэй юу?

Дампуурлын ажиллагааны гол зорилго нь хариуцагчийн төлбөрийн чадваргүй болсон шалтгааныг тодруулах, түүний эд хөрөнгийг хамгаалах замаар нэхэмжлэгчдийн шаардлагыг хамгийн боломжит дээд хэмжээгээр хангах явдал юм. Хэрэг үүсгэхээс өмнө байгуулсан гэрээ нь их хэмжээний хөрөнгө гадагшлахад хүргэж, эрсдэл үүсгэж байвал түүнийг хэрэгжүүлэх нь нэхэмжлэгчдийн эрх ашгийг хохироох үр дагавартай байдаг.

Иймээс дампуурлын ажиллагааны явцад хариуцагчийн хуваарилагдах эд хөрөнгийн хэмжээг нэмэгдүүлэх, хөрөнгийг бэлэн мөнгөжүүлэх боломжийг хадгалахын тулд гүйцэтгээгүй байгаа уг гэрээг цуцлуулахаар шаардлага гаргах нь нэхэмжлэгчдийн хууль ёсны эрх ашигт бүрэн нийцнэ.