Засаг даргаас Г-ийн газар эзэмших эрхийг “бусдын газартай давхцалтай” гэсэн үндэслэлээр хүчингүй болгосон. Г уг захирамжийг хүчингүй болгуулахаар шүүхэд нэхэмжлэл гаргасан боловч анхан шатны шүүх түүний нэхэмжлэлийг хэрэгсэхгүй болгосон. Иймд тэрбээр давж заалдах шатны шүүхэд гомдол гаргахдаа “давхцалгүй газар газар эзэмших эрх олгохыг Засаг даргад даалгах” гэж нэхэмжлэлийн шаардлагаа өөрчилсөн. Боломжтой юу?

Захиргааны хэрэг шүүхэд хянан шийдвэрлэх ажиллагаанд нэхэмжлэгч нэхэмжлэлийн шаардлагаа өөрчлөх эрхийг зөвхөн анхан шатны журмаар хэрэг хянан шийдвэрлэх ажиллагааны явцад хэрэгжүүлэх боломжтой байдаг. Өөрөөр хэлбэл, хэргийн нөхцөл байдал, нэхэмжлэлийн үндэслэл, шаардлагыг анхан шатны шүүх бүрэн судалж, түүний хүрээнд шийдвэр гаргадаг.

Давж заалдах шатны шүүх нь анхан шатны шүүхийн шийдвэрийн хууль ёсны бөгөөд үндэслэл бүхий байдлыг анх гаргасан нэхэмжлэлийн шаардлага, хэрэгт авагдсан нотлох баримтын хүрээнд хянадаг зарчимтай. Иймд давж заалдах гомдол гаргахдаа нэхэмжлэлийн шаардлагыг шинээр өөрчлөх нь хуулиар зөвшөөрөгдөөгүй бөгөөд боломжгүй юм.