Байгууллага, албан тушаалтан шүүхийн бие даасан, шүүгчийн хараат бус байдалд халдсан шийдвэр гарсан бол Шүүхийн ерөнхий зөвлөл Үндсэн хуулийн цэцэд хүсэлт гаргуулах саналыг Улсын дээд шүүхэд хүргүүлнэ. Улсын дээд шүүх Үндсэн хуулийн цэцэд хүсэлтээ гаргаж, шийдвэрлүүлнэ гэсэн нь хяналтын аль хэлбэрт хамаарах вэ?

Үндсэн хуулийн шүүн таслах ажиллагаанд тодорхой нэгэн хэрэг маргааныг шийдвэрлэх явцад бус, хууль тогтоомж болон эрх бүхий этгээдийн шийдвэр Үндсэн хуульд нийцэж буй эсэхийг эрх бүхий байгууллагын санаачилга, хүсэлтээр ерөнхийлөн шалгах ажиллагааг абстракт хяналт гэж үздэг.

Энэ тохиолдолд шүүхийн бие даасан, шүүгчийн хараат бус байдалд халдсан шийдвэрийг тодорхой нэг хэрэг маргааны үйл баримтаас хамааралгүйгээр Үндсэн хуулийн цэцэд хүсэлт болгон тавьж, Үндсэн хууль зөрчсөн эсэхийг хянуулахаар хандаж байгаа нь абстракт хяналтын хэлбэрийн үндсэн шинжийг хангаж байна.