Зам барих трассын газарт орсон тул хашаа, байшингаа чөлөөлж өгөхийг иргэнД-оос Нийслэлийн Засаг даргын зүгээс шаардсан байна. Уг иргэнд өөр нэг газар өгөх буюу мөнгөөр нөхөн олговор олгоно гэсэн тул уг иргэн газраа даруй өөрийн зардлаар чөлөөлжээ. Гэтэл Нийслэлийн Засаг даргаас замын трассын хамрах газар өөрчлөгдсөн тул одоо танайх газраа чөлөөлөх шаардлагагүй гэжээ. Энэ тохиолдолд иргэн Д-ийн эрхийг хамгаалах ямар зарчим яригдах боломжтой вэ?

Захиргааны байгууллага, албан тушаалтны амлалт, өгсөн чиглэл болон хууль ёсны шийдвэрт иргэн итгэж, түүнд үндэслэн тодорхой бодит үйлдэл хийж эд хөрөнгө, зардлаараа хохирсон тохиолдолд уг иргэний итгэлийг хамгаалах шаардлага үүсдэг. Энэ тохиолдолд захиргааны эрх зүйн хууль ёсны итгэлийг хамгаалах зарчим хөндөгдөнө.

Иргэн Д нь захиргааны байгууллагын шаардлага, нөхөн олговор олгох амлалтад итгэн газраа өөрийн зардлаар даруй чөлөөлсөн тул түүний тухайн шийдвэр, амлалтад итгэсэн итгэл нь хуулиар хамгаалагдах учиртай. Захиргааны байгууллага дараа нь нөхцөл байдал өөрчлөгдсөн гэх үндэслэлээр шийдвэрээсээ буцаж, иргэнийг хохироох ёсгүй тул уг зарчмын дагуу иргэний эрхийг хамгаалах боломжтой.