Тогтоол №2973

ХЭРГИЙН ТАНИЛЦУУЛГА: "Кевико" ХХК нь Харилцаа холбооны зохицуулах хорооны телевиз, радиогийн олон сувгийг хиймэл дагуулаар дамжуулах үйлчилгээ эрхлэх тусгай зөвшөөрөл олгох сонгон шалгаруулалтад оролцсон. Компаний зүгээс сонгон шалгаруулалтын явцад журам зөрчигдсөн, үнэлгээ нь үндэслэлгүй, хугацаа хэтэрсэн гэж үзэн, зохицуулах хорооны болон үнэлгээний хорооны шийдвэрүүдийг хууль бус болохыг тогтоож, хүчингүй болгуулахаар шүүхэд хандсан. Хариуцагч тал нь зохицуулах хорооны холбогдох журмууд нь нийтээр дагаж мөрдөх хэм хэмжээ биш, дотоод асуудлыг зохицуулсан баримт бичиг хэмээн тайлбарласан. АНХАН ШАТ: Нэхэмжлэлийн шаардлагыг бүхэлд нь хэрэгсэхгүй болгож, нэхэмжлэгчийн гаргасан журмууд болон шийдвэрүүдийг хууль бус болохыг тогтоож, хүчингүй болгуулах тухай нэхэмжлэлийг бүхэлд нь хэрэгсэхгүй болгосон. ДАВЖ ЗААЛДАХ ШАТ: Анхан шатны шүүхийн шийдвэрийг хүчингүй болгож, хэргийг дахин хэлэлцүүлэхээр мөн шүүхэд буцааж шийдвэрлэсэн. Шаардлагатай үзлэг хийж, дүгнэлт өгөх замаар хэргийг шийдвэрлэх шаардлагатай гэж үзсэн. ХЯНАЛТЫН ШАТ: Давж заалдах шатны шүүхийн магадлалыг хэвээр үлдээж, хариуцагчийн итгэмжлэгдсэн төлөөлөгчийн хяналтын журмаар гаргасан гомдлыг хангахгүй орхиж шийдвэрлэсэн. Анхан шатны шүүх нэхэмжлэлийн шаардлага тус бүрд эрх зүйн дүгнэлт өгөөгүй, нотлох баримт цуглуулалгүйгээр хэргийг шийдвэрлэж, хэрэг хянан шийдвэрлэх ажиллагааны журам зөрчсөн, энэ талаарх давж заалдах шатны шүүхийн дүгнэлт зөв болсныг тогтоосон. ҮНДЭСЛЭЛ: Нэхэмжлэгч нь үнэлгээний хорооны үнэлгээтэй холбогдуулан маргасан байхад анхан шатны шүүх "Үнэлгээний хорооны гишүүдийн үнэлгээг шүүх хөндлөнгөөс үнэлэх боломжгүй" хэмээн уг үндэслэлийг шалгалгүй орхигдуулсан нь буруу. Захиргааны хэргийн шүүх нь үнэлгээ хийх журам зөрчсөн эсэх, адил тохиолдолд өөр өөрөөр үнэлсэн эсэх нөхцөл байдал, үндэслэлийг шалгах эрхтэй.