Тогтоол №1122

ХЭРГИЙН ТАНИЛЦУУЛГА: “Г.М” ХХК нь Ашигт малтмал, газрын тосны газрын Сонгон шалгаруулалтын комиссын тус компанийг тендерт шалгаруулахаас татгалзсан шийдвэрийг хууль бус болохыг тогтоолгох, мөн “Г.О” ХХК-д олгосон тусгай зөвшөөрлийг хүчингүй болгуулах, саналыг нь хуульд нийцүүлэн үнэлэхийг даалгах шаардлага бүхий нэхэмжлэл гаргасан.

АНХАН ШАТ: Ашигт малтмалын тухай хуулийн 17.1, 19.2, 19.2.1-д заасныг үндэслэн “Г.М” ХХК-ийн нэхэмжлэлийн шаардлага болох комиссын шийдвэрийг хууль бус тогтоолгох, мөн “Г.О” ХХК-д олгосон тусгай зөвшөөрлийг хүчингүй болгуулах, саналыг үнэлэхийг даалгах шаардлагыг хэрэгсэхгүй болгож, нэхэмжлэлийг хүлээн авахаас татгалзсан.

ДАВЖ ЗААЛДАХ ШАТ: Анхан шатны шүүхийн шийдвэрийн зарим хэсгийг өөрчилж, бусад заалтыг хэвээр үлдээсэн.

ХЯНАЛТЫН ШАТ: Анхан болон давж заалдах шатны шүүхүүд Захиргааны хэрэг шүүхэд хянан шийдвэрлэх тухай хуулийн 14.1 дэх заалтын зохицуулалтыг тухайн маргаанд буруу тайлбарлаж хэрэглэснээс “илт хууль бус болохыг тогтоолгох” нэхэмжлэлийн шаардлагад хөөн хэлэлцэх хугацаа хамаарахгүй гэсэн үндэслэлээр нэхэмжлэлийн шаардлагыг шийдвэрлэсэн нь буруу байна. Мөн “Г.О” ХХК-д олгосон тусгай зөвшөөрлийг хүчингүй болгуулах, нэхэмжлэгчийн саналыг үнэлүүлэх шаардлага нь хүчингүй саналыг үнэлэхээс татгалзсан шийдвэртэй уялдуулсан байхад бие даасан шаардлага гэж үзэхгүй, захиргааны шүүхийн харьяаллын маргаан биш гэж үзсэн нь үндэслэлгүй. Нэхэмжлэгч нь сонгон шалгаруулалтад ирүүлсэн санал нь хүчингүйд тооцогдож, санал, баримтыг буцааж өгсөн тул гомдол гаргах эрхээ хэрэгжүүлээгүй, улмаар ялагчийг сонгон шалгаруулсан шийдвэрийн улмаас нэхэмжлэгчийн эрх, хууль ёсны ашиг сонирхол зөрчигдөхгүй.

ҮНДЭСЛЭЛ:

1. Сонгон шалгаруулалтад оролцохоор ирүүлсэн санал нь хүчингүйд тооцогдож, санал, баримтыг буцаан өгсөн тохиолдолд нэхэмжлэгч нь ялагчийг шалгаруулсан шийдвэртэй маргах, нэхэмжлэл гаргах эрхгүй этгээд гэж үзнэ.
2. “Илт хууль бус болохыг тогтоолгох” нэхэмжлэлийн шаардлагад хөөн хэлэлцэх хугацаа хамаарна.
3. Ашигт малтмалын тухай хуулийн 17.1-д заасны дагуу “төрийн захиргааны байгууллагаас гаргасан нэг загварын газрын зураг дээр үйлдээгүй” гэх үндэслэлээр саналыг хүчингүй тооцож, буцааж өгсөн нь хуульд нийцсэн үйлдэл байна.
4. Хамгаалагдах эрх, ашиг сонирхол нь зөрчигдөөгүй тохиолдолд шүүхэд хандах эрх үүсэхгүй.
5. Анхан шатны шүүхийн шийдвэр, давж заалдах шатны шүүхийн магадлалд өөрчлөлт оруулж, нэхэмжлэлийг бүхэлд нь хүлээн авахаас татгалзах өөрчлөлт хийсэн.