Тогтоол №8982

ХЭРГИЙН ТАНИЛЦУУЛГА: Улсын байцаагчаас "цацрагийн үүсгүүр"-ийг зөвшөөрөлгүй хадгалсан зөрчлийг тогтоож, үйлдвэрийг торгох шийтгэл ногдуулсныг прокурор хүчингүй болгуулахаар шаардсан. Анхан шатны шүүх прокурорын шаардлагыг хангаж, шийтгэлийг хүчингүй болгожээ. АНХАН ШАТ: Зөрчил шалган шийдвэрлэх тухай хуулийн 6.4.2, 6.7.1-д заасныг үндэслэн улсын байцаагчийн шийтгэлийг хүчингүй болгосон. ДАВЖ ЗААЛДАХ ШАТ: Гуравдагч этгээдийн итгэмжлэгдсэн төлөөлөгч анхан шатны шүүхийн шийдвэрийг эс зөвшөөрч, шийтгэл ногдуулах нь буруу, мөн үйлдлийг эрүүгийн гэмт хэрэгт тооцох үндэслэлгүй, шүүхийн үйл ажиллагаанд журмын зөрчил гарсан гэж маргасан. ҮНДЭСЛЭЛ: Цацрагийн үүсгүүр, цацраг идэвхт бодисыг Цөмийн энергийн тухай хууль болон холбогдох нормативаар нэг ойлголтоор тодорхойлсон. Хуульд заасан тусгай зөвшөөрөлгүйгээр цацрагийн үүсгүүр хадгалсан нь Зөрчлийн тухай хуулийн 5.15.2-т хамаарах бөгөөд энэ нь Эрүүгийн хуулийн 24.4-т заасан гэмт хэргийн шинжтэй эсэхийг тогтоох эсэх нь үйлдлийн нийгмийн аюулын шинж чанар, хор уршиг зэргээс хамаарна. Тусгай зөвшөөрөлгүй үйлдсэн бүр гэмт хэрэгт тооцогдохгүй тул улсын байцаагч зөрчлийг шалган шийдвэрлэх ажиллагааны журмыг зөрчөөгүй, харин анхан шатны шүүх хууль хэрэглээний алдаа гаргасан. Зөрчлийн шинж, хохирлын хэмжээнд улсын байцаагчийн ногдуулсан шийтгэл тохирсон тул шийтгэлийг хүчингүй болгох үндэслэлгүй.