Тогтоол №8476

ХЭРГИЙН ТАНИЛЦУУЛГА: "С" ХХК нь Шүүх шинжилгээний байгууллагын лабораториудын шинжилгээний багаж, тоног төхөөрөмж нийлүүлэх тендерээс татгалзсан шийдвэрийг хууль бус болохыг тогтоолгох, гэрээ байгуулах эрх олгох зөвлөмж хүргүүлэхийг шаардсан. АНХАН ШАТ: Нэхэмжлэлийг бүхэлд нь хэрэгсэхгүй болгосон. ДАВЖ ЗААЛДАХ ШАТ: Нэхэмжлэгч нь татгалзсан үндэслэлийг тодорхой дурдаагүй, тайлбарлаагүй, техникийн тодорхойлолтод заагаагүй шаардлага тавьсан, дүйцэхүйц барааг ижил биш гэж үзсэн нь үндэслэлгүй гэж гомдол гаргасан.

ҮНДЭСЛЭЛ: Шүүх шинжилгээний ерөнхий газраас "С" ХХК-ийн тендерээс татгалзсан мэдэгдэл нь хуулийн 26.4.2-т заасныг хангаагүй болсныг мэдэгдэж, үндэслэлээ тодорхой заагаагүй нь Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 28.2-г зөрчсөн. Тендер шалгаруулалтын баримт бичигт дээж авагчийн тоо ширхэг, онцлох шинжийг тодорхой заагаагүй байхад, тухайн компаниас тодруулга авахдаа баримт бичигт тодорхойгүй заасан зүйлээ дараа нь тодруулж, нэмж авах эрх олгосон зохицуулалт байхгүй байтал "С" ХХК-ийн санал болгосон барааг техникийн тодорхойлолттой илүү нарийвчлан харьцуулж, дахин хэлэлцэн шийдвэр гаргасан нь хуулийн 25.1-г зөрчсөн. Тендер шалгаруулалтын баримт бичгийн техникийн тодорхойлолтод тодорхой нэг аж ахуй эрхлэгчийн бараа, үйлчилгээний худалдааны нэр, патент, түүнийг эзэмшигч, үйлдвэрлэгч, нийлүүлэгч, эсхүл үйлдвэрлэлийн арга, гарал үүслийг тухайлан заахыг хориглосон хуулийн 12.4-г зөрчсөн. Шүүхийн шийдвэрийн зарим хэсгийг өөрчлөн, нэхэмжлэлийн зарим хэсгийг хангасан.