Тогтоол №7949

ХЭРГИЙН ТАНИЛЦУУЛГА: Үл хөдлөх хөрөнгийг нэг этгээдээс нөгөөд шилжүүлэн бүртгэсэн бүртгэлийг хүчингүй болгуулах тухай нэхэмжлэл гаргасан.

АНХАН ШАТ: Шүүх хэргийн нөхцөл байдлыг цаашид тодруулах шаардлагатай бөгөөд энэ нь захиргааны хэргийн шүүхийн шинжлэн судлах хүрээнээс хэтэрсэн гэж үзэн, үл хөдлөх хөрөнгийг шилжүүлэн бүртгэсэн улсын бүртгэлийг дахин акт гаргах хүртэл 6 сар хугацаагаар түдгэлзүүлсэн.

ДАВЖ ЗААЛДАХ ШАТ: Нэхэмжлэгч болон гуравдагч этгээдийн өмгөөлөгч нар анхан шатны шүүхийн шийдвэртэй холбоотой гомдол гаргасан. Гуравдагч этгээдийн өмгөөлөгчийн гомдолд, анхны өмчлөгч нь хөрөнгөө худалдан борлуулсан, улмаар шүүхийн шийдвэр гүйцэтгэх ажиллагааны дагуу өөр этгээдэд шилжин, бүртгэгдсэн боловч анхан шатны шүүх үүнийг харгалзахгүй шийдвэрлэсэн гэж заажээ.

ҮНДЭСЛЭЛ: Улсын бүртгэлийн байгууллага нь хууль хяналтын байгууллагын хязгаарласан шийдвэрийг зөрчиж, эрх хөдөлгөөнийг нь бүртгэхээс татгалзах ёстой байтал уг хязгаарлалтыг үл харгалзан бүртгэл хийсэн нь хууль бус байна. Нэхэмжлэгч нь эрүүгийн хэргийн шийдвэр хараахан хүчин төгөлдөр болоогүй, мөн улсын бүртгэл хийхэд эрх хөдөлгөөний хязгаарлалт үйлчилж байсан гэх үндэслэлээр нэхэмжлэлийн шаардлагыг бүхэлд нь хангаж, анхан шатны шүүхийн шийдвэрийг хүчингүй болгож, улсын бүртгэлийг хүчингүй болгосон.