Тогтоол №7044

ХЭРГИЙН ТАНИЛЦУУЛГА: Иргэн Ч.Т нь орон сууц худалдан авахтай холбогдуулан хувь хүний орлогын албан татварын хөнгөлөлт эдлэх эрхтэй гэж үзэн, татварын хэлтсийн эс үйлдлийг хууль бус гэж маргажээ. Хариуцагч нь гэр бүлийн гишүүний нэг нь хөнгөлөлт эдэлсэн тохиолдолд нөгөө нь дахин эдэлж болохгүй гэж тайлбарласан.

АНХАН ШАТ: Хувь хүний орлогын албан татварын тухай хуулийн дагуу Ч.Т нь татвар төлөгч бөгөөд анх удаа орон сууц худалдан авсан нь тогтоогдож, хөнгөлөлт эдлэх эрхтэй тул татварын хэлтсийн эс үйлдлийг зогсоож, хөнгөлөлтөд хамруулахыг даалгасан.

ДАВЖ ЗААЛДАХ ШАТ: Хариуцагч нь анхан шатны шүүхийн шийдвэрийг эс зөвшөөрч, нэхэмжлэгч болон түүний эхнэр хамтран өмчлөгч байсан учир Ч.Т нь дахин хөнгөлөлт эдлэх эрхгүй гэж маргасан.

ҮНДЭСЛЭЛ: Хувь хүний орлогын албан татварын тухай хуулийн 16 дугаар зүйлийн 16.1.12-т заасны дагуу татвар төлөгч нь татвар ногдох орлоготой байх, анх удаа орон сууц худалдан авсан байх, өмнө нь татварын хөнгөлөлт эдэлж байгаагүй байх гэсэн шаардлагыг хангавал хөнгөлөлт эдлэх эрх үүснэ. Ч.Т нь бие даасан татвар төлөгч бөгөөд эхнэрийн эдэлсэн хөнгөлөлт нь Ч.Т-ын өөрийн хөнгөлөлт эдлэх эрхийг хаах үндэслэл болохгүй тул анхан шатны шүүхийн шийдвэрийг хэвээр үлдээсэн.