Тогтоол №5274

ХЭРГИЙН ТАНИЛЦУУЛГА: Нэхэмжлэгч "М" ГҮТББ нь хариуцагч Цагдаагийн ерөнхий газрын Бүртгэл хяналтын төвөөс галт зэвсэг шилжүүлэх тухай захиргааны акт гараагүй эс үйлдлээс болж иргэн М.С-д гэрчилгээ олгохыг даалгах тухай нэхэмжлэл гаргасан. АНХАН ШАТ: Анхан шатны шүүхээс Галт зэвсгийн тухай хуулийн 19.7-г баримтлан спорт-сургалтын зориулалттай галт зэвсгийг нийтэд худалдахыг хориглосон гэж үзэн нэхэмжлэлийг бүхэлд нь хэрэгсэхгүй болгосон. ДАВЖ ЗААЛДАХ ШАТ: Нэхэмжлэгч нь анхан шатны шүүхийн шийдвэрийг эсэргүүцэж, тухайн галт зэвсгийг худалдах бус харин гишүүн, тамирчин болох М.С-д өмчлүүлэхээр хүсэлт гаргасан, хуульд бусдад шилжүүлэхийг хориглоогүй, шүүх хуулийг буруу тайлбарласан гэж маргасан. Давж заалдах шатны шүүхээс нэхэмжлэгчийн галт зэвсгийг бусдад худалдах буюу өмчлүүлэх боломжгүй, спорт-сургалтын зориулалттай галт зэвсгийг зөвхөн спорт-сургалтын үйл ажиллагаа эрхлэх зорилгоор ашиглах ёстой, худалдаалах эрх бүхий этгээд нь буудлага спорт-сургалтын үйл ажиллагаа эрхэлдэггүй байх ёстой гэсэн журмыг үндэслэн анхан шатны шүүхийн шийдвэрийг хэвээр үлдээсэн.

ҮНДЭСЛЭЛ: Спорт-сургалтын зориулалттай галт зэвсгийг импортлох, нийтэд худалдах тусгай зөвшөөрөл олгох журмын дагуу тусгай зөвшөөрөлтэй этгээд нь зөвхөн спорт-сургалтын үйл ажиллагаа эрхлэх тусгай зөвшөөрөлтэй иргэн, хуулийн этгээд спорт-сургалтын зориулалттай галт зэвсгийг спортын тэмцээн, бэлтгэл хийх хэрэгцээнд ашиглах зорилгоор улсын хилээр нэвтрүүлэх зөвшөөрөл авах бөгөөд энэ галт зэвсгийг нийтэд худалдах болон өмчлүүлэх боломжгүй.