Тогтоол №5062

ХЭРГИЙН ТАНИЛЦУУЛГА: "Х" ХХК нь Байгаль орчны менежментийн төлөвлөгөөгөө батлуулах хүсэлтээ сумын Засаг даргад хүргүүлсэн боловч баталж өгөөгүйн улмаас тусгай зөвшөөрөл нь цуцлагдах эрсдэлтэй байдалд хүрсэн тул Засаг даргын эс үйлдэхүйг хууль бус болохыг тогтоож, төлөвлөгөөг батлахыг даалгах нэхэмжлэл гаргасан. АНХАН ШАТ: Ашигт малтмалын тухай хуулийн холбогдох зүйл заалтуудыг үндэслэн нэхэмжлэлийг бүхэлд нь хэрэгсэхгүй болгосон. ДАВЖ ЗААЛДАХ ШАТ: Нэхэмжлэгч нь анхан шатны шүүх хуулийг буруу хэрэглэсэн гэж гомдол гаргасан. Гэвч давж заалдах шатны шүүх нь Ашигт малтмалын тухай хуулийн 38 дугаар зүйлийн 38.1.1, 38.1.3, 38.1.4, 38.1.5, 38.1.6, 38.2, 40 дүгээр зүйлийн 40.1, 40.3, 22 дугаар зүйлийн 22.1.3, 12 дугаар зүйлийн 12.2.5-д заасныг үндэслэн, нэхэмжлэгч нь өмнөх төлөвлөгөөний хувийг болон жилийн тайлангуудыг холбогдох байгууллагуудад хуулийн дагуу хүргүүлж батлуулсан баримт байхгүй, мөн хайгуулын тусгай зөвшөөрөл сунгах хугацаанаас өмнө төлөвлөгөөг батлуулж амжаагүй байсан тул нэхэмжлэгчийн гомдлыг хангахгүй орхиж, анхан шатны шүүхийн шийдвэрийг хэвээр үлдээсэн.

ҮНДЭСЛЭЛ: Хайгуулын тусгай зөвшөөрөл эзэмшигч нь байгаль орчныг хамгаалах төлөвлөгөөг боловсруулж, батлуулах, холбогдох баримтуудыг хугацаанд нь хүргүүлэх үүрэгтэй. Хариуцагч нь хуульд заасан үндэслэлээр байгаль орчны төлөвлөгөөг батлахаас татгалзсан нь үндэслэлтэй байна. Тусгай зөвшөөрөл сунгах ажиллагаанд шаардлагатай байгаль орчны менежментийн төлөвлөгөөг хуульд заасан хугацаанд батлуулж амжаагүй нь нэхэмжлэгчийн буруутай үйлдэл байна.