Тогтоол №2792

ХЭРГИЙН ТАНИЛЦУУЛГА: “Е” ХХК нь Байгаль орчин, аялал жуулчлалын сайдын газар ашиглах эрхтэй холбоотой тушаалыг хүчингүй болгуулах шаардлага гаргасан. АНХАН ШАТ: Захиргааны ерөнхий хууль, Газрын тухай хууль, Тусгай хамгаалалттай газар нутгийн тухай хуулийг үндэслэн “Е” ХХК-ийн нэхэмжлэлийг бүхэлд нь хэрэгсэхгүй болгосон. ДАВЖ ЗААЛДАХ ШАТ: Нэхэмжлэгч нь анхан шатны шүүхээс газрын давхцал, хууль хэрэглээ, нотлох баримтын үнэлгээг буруу хийсэн гэж гомдол гаргасан. Тодруулбал, нэхэмжлэгчийн газрын зөвшөөрөлгүй оршин сууж байсан иргэдийн газартай давхцаагүй, хуулийн дагуу газар ашиглах эрхгүй этгээдтэй давхцал үүсэх боломжгүй, түүнчлэн захиргааны байгууллагаас газрын эрх цуцлахдаа үндэслэл болгосон хориглосон үйл ажиллагааны талаар нотлох баримтгүй байсан тул хууль бус шийдвэр гаргасан гэж үзсэн.

ҮНДЭСЛЭЛ: Давж заалдах шатны шүүх анхан шатны шүүхийн дүгнэлт, хууль хэрэглээг буруу гэж үзсэн. Газрын тухай хууль, Тусгай хамгаалалттай газар нутгийн тухай хуулиар газар эзэмших, ашиглах эрх нь гэрээ, эрхийн гэрчилгээ, зориулалтын дагуу байх ёстой. Гуравдагч этгээдүүд нь хуулийн дагуу эрх бүхий байгууллагад хүсэлт гаргаж, эрх үүсээгүй, мөн он удаан жил амьдраагүй байсан тул тэдгээрийн газрыг нэхэмжлэгчийн газартай давхцсан гэж үзэх боломжгүй. Мөн нэхэмжлэгчийн үйл ажиллагааг хориглосон хуулийн заалт болон гэрчилгээ цуцлах үндэслэл нь захиргааны акт болон хэрэгт авагдсан баримтад тусгагдаагүй байсан. Иймд анхан шатны шүүхийн шийдвэрийг хүчингүй болгож, нэхэмжлэлийг хангасан.