Тогтоол №1966

ХЭРГИЙН ТАНИЛЦУУЛГА: Компани нь газар эзэмшүүлэх гэрээний нөхцлийг зөрчсөн, газрыг зориулалтын бусаар ашигласан, газрын төлбөрөө хугацаанд нь төлөөгүй гэх үндэслэлээр Засаг даргын захирамжаар газар эзэмших эрхийг нь хүчингүй болгосон. Компанийн зүгээс Засаг даргын шийдвэрийг хууль бус гэж үзэн, уг захирамжийг хүчингүй болгуулахаар нэхэмжилжээ. АНХАН ШАТ: Захиргааны хэргийн анхан шатны шүүхээс компанийн нэхэмжлэлийг хангаж, Засаг даргын захирамжийг хууль бус болохыг тогтоож, хүчингүй болгосон. ДАВЖ ЗААЛДАХ ШАТ: Хариуцагч (Засаг дарга) нь анхан шатны шүүхийн шийдвэрийг эс зөвшөөрч, компани нь гэрээний нөхцлөө хангаагүй, газрыг зориулалтын дагуу ашиглаагүй, газрын төлбөрийг төлөөгүй, газрыг барьцаанд тавьсан талаараа мэдэгдээгүй, гэрээний хугацаа дууссан байхад сунгах хүсэлт гаргаагүй зэрэг үндэслэлээр давж заалдах гомдол гаргасан. Давж заалдах шатны шүүх анхан шатны шүүх хэргийг буруу шийдвэрлэсэн гэж үзээд, шийдвэрийг хүчингүй болгон нэхэмжлэлийг бүхэлд нь хэрэгсэхгүй болгож, хариуцагчийн гомдлыг хангасан.

ҮНДЭСЛЭЛ: Газрын тухай хуулийн дагуу газар эзэмшигч нь гэрээний нөхцлийг биелүүлэх, газрыг зориулалтын дагуу ашиглах үүрэгтэй. Хүндэтгэн үзэх шалтгаангүйгээр 2 жил дараалан газрыг ашиглаагүй буюу гэрээний хугацаа дууссан байхад сунгах хүсэлт гаргаагүй тохиолдолд газар эзэмших эрхийг хүчингүй болгох хуулийн зохицуулалттай. Компани нь уг хуулийн заалтыг зөрчсөн нь тогтоогдож, анхан шатны шүүх нотлох баримтыг буруу үнэлсэн байна.