Тогтоол №1425

ХЭРГИЙН ТАНИЛЦУУЛГА: Нэхэмжлэгч нь ажлаас чөлөөлсөн тушаалыг эс зөвшөөрч, үндэслэл нь гэрээний үнэлгээ хууль бус болохыг тогтоолгох, ажлаас чөлөөлөх шийдвэрийг хүчингүй болгож, албан тушаалд эгүүлэн тогтоолгох, ажилгүй байсан хугацааны олговор гаргуулах шаардлага гаргасан. АНХАН ШАТ: Төрийн албаны тухай хууль, Захиргааны ерөнхий хуулийн зүйл заалтыг баримтлан, нэхэмжлэгчийн шаардлагыг бүхэлд нь хангаж, үр дүнгийн гэрээний F үнэлгээг хууль бус болохыг тогтоож, сайдын тушаалыг хүчингүй болгож, нэхэмжлэгчийг урьд эрхэлж байсан албан тушаалд нь эгүүлэн тогтоож, ажилгүй байсан хугацааны цалин хөлстэй тэнцэх олговор гаргуулах шийдвэрлэсэн. ДАВЖ ЗААЛДАХ ШАТ: Хариуцагч нь анхан шатны шүүхийн шийдвэрийг эс зөвшөөрч, үр дүнгийн гэрээний үнэлгээг хүчин төгөлдөр бус гэж дүгнэсэн нь үндэслэлгүй, мөн шүүх хэрэглэх ёсгүй хуулийг буруу тайлбарлаж хэрэглэсэн гэж гомдол гаргасан. ҮНДЭСЛЭЛ: Хариуцагч нь үр дүнгийн гэрээг дүгнэхдээ холбогдох журмын дагуу нэхэмжлэгчтэй ярилцлага хийгээгүй, тайлбар гаргах боломж олгоогүй, гэрээний нэг тал болох нэхэмжлэгч илтгэх хуудсанд гарын үсэг зураагүй нь үнэлгээг хууль бус болгосон. Ажлаас чөлөөлөх шийдвэр нь захиргааны акт гаргах шаардлага, үндэслэлийг хангаагүй. Анхан шатны шүүхийн шийдвэрийн зарим хэсгийг өөрчилж, хариуцагчийн гомдлыг хангахгүй орхисон.