Тогтоол №1049

ХЭРГИЙН ТАНИЛЦУУЛГА: Нэхэмжлэгчийн ашигт малтмалын хайгуулын тусгай зөвшөөрлийг 2015 оны төлбөр төлөөгүй үндэслэлээр цуцалсан Ашигт малтмал, газрын тосны газрын шийдвэрийг хүчингүй болгож, тусгай зөвшөөрлийг сэргээхийг нэхэмжилжээ. Нэхэмжлэгч нь орон нутгийн удирдлага хайгуулын үйл ажиллагаанд саад учруулж, үйл ажиллагаа явуулах боломжгүй болсон тул төлбөр төлөх нөхцөл бүрдээгүй гэж тайлбарласан. АНХАН ШАТ: Ашигт малтмалын тухай хуулийн 34.2, 34.7, 56.1.2-т заасныг үндэслэн нэхэмжлэлийг бүхэлд нь хэрэгсэхгүй болгосон. ДАВЖ ЗААЛДАХ ШАТ: Нэхэмжлэгчийн давж заалдах гомдлыг хангаж, анхан шатны шүүхийн шийдвэрийг хүчингүй болгож, нэхэмжлэлийг бүхэлд нь хангасан. Ашигт малтмалын тухай хуулийн 21.1.1, 56.3, 56.4-т заасныг баримтлан шийдвэрлэсэн.

ҮНДЭСЛЭЛ: Орон нутгийн удирдлага тусгай зөвшөөрөлтэй талбайд хайгуулын үйл ажиллагаа явуулахыг хориглож, саад учруулсны улмаас нэхэмжлэгч хайгуулын эрхээ эдэлж чадаагүй, үүнээс үүдэн төлбөрөө төлөх боломжгүй болсон нь тогтоогдсон. Хариуцагч нь нэхэмжлэгчийн ирүүлсэн маргаантай нөхцөл байдлыг баталгаажуулсан баримт бичгийг Ашигт малтмалын тухай хуулийн 56.3-т заасны дагуу хянаж, 56.4-т заасан шийдвэрийг гаргаагүй нь хууль зөрчсөн. Иймд хайгуулын эрхээ хэрэгжүүлээгүй нөхцөлд төлбөр төлөөгүй гэж үзэж тусгай зөвшөөрөл цуцлах нь Ашигт малтмалын тухай хуулийн 21.1.1-т нийцэхгүй. Анхан шатны шүүх хэрэгт авагдсан баримтыг буруу үнэлж, захиргааны актыг хууль ёсны гэж үзсэн нь үндэслэлгүй. Иймд захиргааны актийг хүчингүй болгож нэхэмжлэлийг хангасан.