Тогтоол №7026

ХЭРГИЙН ТАНИЛЦУУЛГА: Зохиогчийн эрхийн зөвшөөрөлгүй ашигласан зөрчлийг шалгаж, Зөрчлийн тухай хуулийн 8.3-д заасны дагуу шийтгэл ногдуулсан шийтгэлийн хуудсыг хүчингүй болгуулах тухай нэхэмжлэлийн гомдол. Нэхэмжлэгч нь www.mass.mn сайт нь хуулийн этгээд биш, нийтэлсэн агуулга нь болсон үйл явдлын мэдээлэл тул зохиогчийн эрхээр хамгаалагдахгүй гэж маргаж байв. Хариуцагч нь тухайн агуулга нь зохиогчийн эрхээр хамгаалагдсан бүтээл бөгөөд www.mass.mn сайт нь зөвшөөрөлгүй хуулбарлан нийтэд түгээсэн гэж үзэж байв.

АНХАН ШАТ: Нэхэмжлэлийн шаардлагыг хангаж, Оюуны өмчийн газрын хяналтын улсын байцаагчийн шийтгэлийн хуудсыг хүчингүй болгосон.

ҮНДЭСЛЭЛ: Зохиогчийн эрх болон түүнд хамаарах эрхийн тухай хуулийн 7.1.8-д заасан гэрэл зураг нь 8.1.6-д заасан "болсон үйл явдал, түүний үр дагавар болон тоо баримт бүхий сонордуулгын шинжтэй аливаа мэдээ, мэдээлэл"-д хамаарах эсэх нь тодорхойгүй байхад, хуулийн 12.2.1, 12.2.3-ыг зөрчсөн гэж дүгнэлт хийж шийтгэл ногдуулсан нь үндэслэлгүй. Мөн хуулийн этгээдийн эрхгүй www.mass.mn сайтад шийтгэл ногдуулсан нь хуульд заасан журмыг зөрчсөн. Зөрчил шалган шийдвэрлэх ажиллагаанд холбогдох этгээдийн улсын бүртгэлийн гэрчилгээ болон оюуны өмчийн эрх зөрчигдсөн эсэхийг тогтоогоогүй нь хуульд нийцээгүй.