Тогтоол №6953

ХЭРГИЙН ТАНИЛЦУУЛГА: Хоолны газар нь хоолны дээжийг зохих журмын дагуу аваагүй, ажилтнууд нь эрүүл мэндийн урьдчилан сэргийлэх үзлэг шинжилгээнд хамруулаагүй, ажлын байрандаа ажлын тусгай хувцас хэрэглэл өмсөөгүй зэрэг зөрчлийг илрүүлэн улсын байцаагч тухайн байгууллагыг Зөрчлийн тухай хуулийн холбогдох зүйлийг баримтлан шийтгэсэн боловч прокурор нь шийтгэлийг буруу зүйл, хэсэгт зааснаар ногдуулсан гэж үзэн хүчингүй болгуулах дүгнэлт гаргасан. АНХАН ШАТ: Анхан шатны шүүхээс улсын байцаагчийн оногдуулсан шийтгэлийг хүчингүй болгож, зөрчилд тохирох хуулийн зүйл, хэсгийг баримтлан шийтгэл оногдуулах нь зүйтэй гэж шийдвэрлэсэн.

ҮНДЭСЛЭЛ: Шүүх хуульд заасан журмын дагуу зөрчлийн хэрэг үүсгэн, хэрэг хянан шийдвэрлэх ажиллагаа явуулж, талуудын гаргасан тайлбар, нотлох баримтуудыг үнэлэн дүгнэлт хийсэн. Гэтэл улсын байцаагч нь хоолны дээжийг зохих журмын дагуу аваагүй, ажлын байранд ажлын хувцас хэрэглэл өмсөж хэвшээгүй, ажилтнуудыг эрүүл мэндийн үзлэг, шинжилгээнд хамруулаагүй, үйлдвэрлэлийн холбогдох дүрэм, журам мөрдөж хэвшээгүй зөрчлүүдийг нэг үйлдлээр төлөөлүүлж, Зөрчлийн тухай хуулийн тусгай ангийн 11.2 дугаар зүйлийн 1 дэх хэсгийн 1.2-т заасан шийтгэлийг оногдуулсан нь хуульд нийцэхгүй байна. Зөрчлийн тухай хуулийн 1.3 дугаар зүйлийн 2-т зөрчил тус бүрд шийтгэл оногдуулна гэж заасан байдаг.