Тогтоол №6329

ХЭРГИЙН ТАНИЛЦУУЛГА: Ашигт малтмалын хайгуулын тусгай зөвшөөрлийн хугацаа сунгуулах өргөдлийг нь хүлээн аваагүй, улмаар хугацааг дууссан гэж бүртгэсэн нь хууль бус болохыг тогтоож, өргөдлийг хүлээн авахыг даалгах тухай нэхэмжлэл гаргасан.

АНХАН ШАТ: Нэхэмжлэгчийн хайгуулын тусгай зөвшөөрлийн хугацаа сунгуулах өргөдлийг хүндэтгэх шалтгаантай байхад хүлээж аваагүй, улмаар бүртгэлийг дуусгавар болгосон нь хууль бус болохыг тогтоон, өргөдлийг хүлээн авахыг хариуцагчид даалгаж, нэхэмжлэлийн шаардлагыг бүхэлд нь хангасан.

ҮНДЭСЛЭЛ: Захиргааны байгууллага нь хуульд заасан журмын дагуу өргөдлийг хүлээн авч шийдвэрлэх үүрэгтэй. Нэхэмжлэгчээс хугацаа сунгуулах хүсэлтээ хуулийн хугацаанд буюу тусгай зөвшөөрлийн хугацаа дуусахаас нэг сарын өмнө гаргах ёстой байсан ч, байгаль орчны төлөвлөгөөгөө батлуулах явцад зайлшгүй шалтгаанаар хоцорсон байна. Гэсэн хэдий ч, захиргааны байгууллага нь нэхэмжлэгчийн өргөдлийг хүндэтгэх шалтгаантай байхад нь хүлээж аваагүй, улмаар бусад хуулийн этгээдтэй харьцуулахад ялгавартай хандаж, өргөдлийг хүлээн авахаас татгалзсан нь "Иргэдээс төрийн байгууллага, албан тушаалтанд гаргасан өргөдөл, гомдлыг шийдвэрлэх тухай хууль"-ийн 7 дугаар зүйлийн 7.1.2-т заасныг зөрчсөн, хууль бус үйлдэл болсон.