Тогтоол №5771

ХЭРГИЙН ТАНИЛЦУУЛГА: "Бадамлах дөл" ХХК-ний итгэмжлэгдсэн төлөөлөгч нь тус компанид ногдуулсан шийтгэлийг илт хууль бус болохыг тогтоолгох, улмаар дараагийн шатны байцаагчийн шийдвэрийг хүчингүй болгуулах шаардлага гаргасан. Төлөөлөгчийн гомдлоор, компанийг төвлөрсөн дулаан хангамжийн дүрэм зөрчиж, орон сууцыг дулаанаар хангах үүргээ биелүүлээгүй гэх үндэслэлээр Зөрчлийн тухай хуулийн 12.8 дугаар зүйлийн 5 дахь хэсэгт заасныг үндэслэн торгох шийтгэл оногдуулсан нь хууль ёсны зарчим, шударга ёсны зарчмыг зөрчсөн, мөн холбогдогчийг буруу тодорхойлсон, эрхийг нь хангалгүй ажилласан гэж үзсэн. Хариуцагч байцаагч нь Зөрчил шалган шийдвэрлэх тухай хуулийн дагуу бүртгэл, мэдүүлэг авч ажиллагааг явуулсан, төлөөлөгчийг оролцуулсан, шийтгэлийг аж ахуйн нэгжийн захиргаа төлнө гэж тайлбарласан. Дээд шатны байцаагч нь шийтгэл ногдуулсан нь зөв боловч холбогдогчийг буруу тодорхойлсон тул шийтгэлийн холбогдох хэсгийг хүчингүй болгож, компанийн захирлыг холбогдогчоор тогтоож ажиллахыг даалгасан. АНХАН ШАТ: Анхны шатны шүүх нь гомдол гаргагчийн шаардлагыг бүхэлд нь хангаж, улсын байцаагчийн шийтгэлийн хуудсыг илт хууль бус болохыг тогтоож, улсын ахлах байцаагчийн шийдвэрийг хууль бус болохыг тогтоон хүчингүй болгожээ.

ҮНДЭСЛЭЛ: Шүүх нь Эрчим хүчний хяналтын улсын байцаагчийн шийтгэлийн хуудас нь Захиргааны ерөнхий хуулийн зорилго, шийдвэр үндэслэлтэй байх зарчимд нийцээгүй, агуулгын илт алдаатай захиргааны акт гэж үзсэн. Мөн Зөрчил шалган шийдвэрлэх тухай хуулийн дагуу зөрчил үйлдсэн этгээдийг холбогдогчоор зөв тодорхойлох ёстой байтал хуулийн этгээдийг төлөөлж оролцсон иргэн Ж.Э-г буруу холбогдогчоор тодорхойлон шийтгэл оногдуулсан нь хууль зүйн үндэслэлгүй, илт хууль бус захиргааны акт болохыг тогтоожээ. Улсын ахлах байцаагчийн шийдвэр нь шийтгэлийн хуудсанд холбогдогчоор тогтоосон хэсгийг хүчингүй болгож, компанид холбогдох арга хэмжээ авч ажиллахыг даалгасан нь үндэслэлгүй гэж үзсэн. Учир нь, байцаагч нь хуульд заасан үндэслэл, журмын дагуу хяналт шалгалт хийгээгүй нь тогтоогдсон.