Тогтоол №3049

ХЭРГИЙН ТАНИЛЦУУЛГА: Иргэн нь авто зогсоол худалдан авсан боловч улсын бүртгэлд шилжүүлэн бүртгүүлэхээс татгалзсан улсын бүртгэлийн байгууллагын үйлдлийг эсэргүүцэн нэхэмжлэл гаргасан. Нэхэмжлэгч нь 2008 онд авто зогсоол худалдан авч, төлбөрийг бүрэн хийсэн бөгөөд 2015 онд шүүхийн шийдвэрээр өмчлөгчөөр тогтоогдсон. Гэвч улсын бүртгэлийн байгууллага нь тухайн авто зогсоолууд нь өмнөх компани болон гуравдагч этгээдийн хооронд байгуулсан зээлийн барьцааны гэрээнд бүртгэлтэй, мөн гүйцэтгэх албанаас эрхийг нь түдгэлзүүлсэн гэх үндэслэлээр нэхэмжлэгчийн нэр дээр шилжүүлэн бүртгэхээс татгалзсан. АНХАН ШАТ: Нэхэмжлэлийг бүхэлд нь хэрэгсэхгүй болгосон.

ҮНДЭСЛЭЛ: Авто зогсоолууд нь "М к" ХХК-ийн барьцаанд байсан ба нэхэмжлэгч энэ барьцаалсан хугацаанаас хойш авто зогсоолуудыг худалдан авчээ. Нэхэмжлэгч нь өмчлөх эрхээ шилжүүлэн бүртгүүлэхэд барьцаалагч этгээдийн зөвшөөрөл болон гүйцэтгэх албанаас тавьсан тусгай тэмдэглэл арилсан талаарх баримтыг хавсаргаагүй нь улсын бүртгэлийн байгууллагаас мэдүүлгийг хүлээн авахаас татгалзах үндэслэл болсон. Улсын бүртгэгч нь Эд хөрөнгө өмчлөх эрх, түүнтэй холбоотой эд хөрөнгийн бусад эрхийн улсын бүртгэлийн тухай хуулийн 19 дүгээр зүйлийн 19.2-т заасны дагуу барьцаалагч этгээдийн зөвшөөрлийг шаардах эрхтэй. "М к" ХХК-ийн өмчлөлд байх үл хөдлөх хөрөнгүүдийг анх бүртгэхдээ дуусаагүй барилга байсан ч хөрөнгө оруулагчийн нэрээр бүртгэх боломжтой байсан. Гэвч нэхэмжлэгч нь авто зогсоолуудын 100 хувийн гүйцэтгэлтэй, бүрэн дууссан үед нь өмчлөх эрхээ улсын бүртгэлд өөрчлөлт оруулах замаар шилжүүлэн бүртгүүлэхээр байсан.