Тогтоол №16312

ХЭРГИЙН ТАНИЛЦУУЛГА: Компани нь улсын хөрөнгө оруулалтаар сургуулийн барилга барих гэрээг нийслэлийн байгууллагатай байгуулсан. Гэтэл Ковид-19 цар тахал, улсын төсөвт хөрөнгө оруулалт удаашрах зэрэг шалтгаанаар барилгын ажил удааширсан. Гүйцэтгэгч компани нь ажлаа үргэлжлүүлж, төсөв нэмэгдүүлэхээр ажиллаж байхад захиалагч тал гэрээг цуцлах мэдэгдэл өгсөн. Компанийн зүгээс энэхүү гэрээ цуцлах шийдвэр нь хууль бус, шударга бус гэж үзэн шүүхэд нэхэмжлэл гаргасан. АНХАН ШАТ: Нийслэлийн Хөрөнгө оруулалтын газрын даргын гэрээ цуцлах тухай мэдэгдэл нь захиргааны актын шинжийг агуулаагүй, эрх зүйн шууд үр дагавар үүсгээгүй тул хүлээн авахаас татгалзсан. Нийслэлийн Хөрөнгө оруулалтын газрын техникийн зөвлөлийн гэрээ цуцлах тухай шийдвэр, Нийслэлийн Засаг даргын тамгын газрын даргын гэрээ цуцлах тухай мэдэгдлийг тус тус хүчингүй болгож, нэхэмжлэлийн шаардлагыг бүхэлд нь хангасан.

ҮНДЭСЛЭЛ: Гэрээ цуцлах шийдвэрийг гаргахдаа холбогдох этгээдүүдэд сонсох ажиллагаа явуулаагүй, тайлбар гаргах боломж олгоогүй нь Захиргааны Ерөнхий хуулийг зөрчсөн. Компани нь улсын төсөвт хөрөнгө оруулалт удаашрах, цар тахлын нөхцөл байдал зэрэг гэнэтийн болон давагдашгүй хүчин зүйлээс болж ажлаа хийж чадаагүй бөгөөд энэ талаарх нотлох баримтуудыг шүүхэд гаргаж өгсөн. Гэрээ цуцлах шийдвэрийг үндэслэсэн техникийн зөвлөлийн хурлын шийдвэр нь хууль ёсны, үндэслэл бүхий байх шаардлагыг хангаагүй тул уг шийдвэрт үндэслэсэн захиргааны бусад актуудыг мөн хүчингүй болгосон.