Тогтоол №3355

ХЭРГИЙН ТАНИЛЦУУЛГА: Нэхэмжлэгч нь зээлээ төлөх боломжгүй болсон тул банк шүүхэд ханджээ. Шүүхийн шийдвэр гүйцэтгэх ажиллагааны хүрээнд нэхэмжлэгчийн хашаа байшинг үнэлсэн бөгөөд нэхэмжлэгч тус үнэлгээг шударга бус, бодит байдалтай нийцэхгүй байна гэж үзэн хүчингүй болгуулахаар нэхэмжилжээ. Хариуцагч тал үйлчлүүлэгчдийн амьдралын бодит байдлыг харгалзан, сайн дураар төлөх хугацааг удаа дараа олгосны эцэст, үл хөдлөх хөрөнгийг битүүмжилж, хураан авч, шинжээчээр үнэлгээ хийлгэсэн бөгөөд энэ нь хуульд нийцсэн гэж тайлбарлажээ. АНХАН ШАТ: Хариуцагч "А" ХХК-ийн гаргасан үнэлгээг хүчингүй болгож, нэхэмжлэгчийн улсын тэмдэгтийн хураамжийн зардлыг хариуцагчаас гаргуулан олгож, шийдвэр гүйцэтгэх ажиллагааг түдгэлзүүлсэн шүүгчийн захирамжийг хүчингүй болгон, банкны нэхэмжлэлтэй холбогдох шийдвэр гүйцэтгэх ажиллагааг сэргээж шийдвэрлэсэн. ДАВЖ ЗААЛДАХ ШАТ: Анхан шатны шүүхийн шийдвэрийн зарим хэсгийг өөрчилж, нэхэмжлэгчийн давж заалдах гомдлыг хангахгүй орхисон. ХЯНАЛТЫН ШАТ: Анхан болон давж заалдах шатны шүүхийн шийдвэр, магадлалыг хүчингүй болгож, хэргийг дахин хэлэлцүүлэхээр анхан шатны шүүхэд буцаасан. Нэхэмжлэгч нь хоёр хариуцагчтай холбогдуулан нэхэмжлэл гаргасан боловч анхан шатны шүүх нэг хариуцагчтай холбоотой шаардлагыг шийдвэрлээгүй нь Иргэний хэрэг шүүхэд хянан шийдвэрлэх тухай хуулийг зөрчсөн гэж үзсэн. ҮНДЭСЛЭЛ: Хяналтын шатны шүүх нь нэхэмжлэгчийн гаргасан гомдлыг хангах нь зүйтэй гэж дүгнэсэн. Анхан шатны шүүх нэхэмжлэгчийн хоёр хариуцагчийн нэгд нь холбогдох шаардлагыг шийдвэрлээгүй нь хэрэг хянан шийдвэрлэх ажиллагааны журмыг зөрчсөн. Нэхэмжлэгч нь хариуцагч байгууллагын ямар ажиллагаанд холбогдуулан нэхэмжлэл гаргаж байгаа нь тодорхой бус байхад шүүх дүгнэлт хийгээгүй нь буруу болсон. Хэрэгт байгаа баримтын хэмжээнд нэхэмжлэлийн талаар дүгнэлт хийх, улмаар эцэслэн шийдвэрлэх боломжгүй тул шийдвэр болон магадлалыг хүчингүй болгож, хэргийг дахин хэлэлцүүлэхээр анхан шатны шүүхэд буцаасан.