Тогтоол №1346

ХЭРГИЙН ТАНИЛЦУУЛГА: Нэхэмжлэгч нь хариуцагчаас зээлсэн 5,200,000 төгрөгөөс 1,500,000 төгрөгийг эргүүлэн авч, 200,000 төгрөгийг нэхэмжлэхгүй, үлдэгдэл 3,500,000 төгрөгийг гаргуулахаар нэхэмжилсэн. Хариуцагч нь нэхэмжлэгчээс 5,200,000 төгрөг аваагүй, нэхэмжлэгч өөрийн сайн дураар 2,000,000 төгрөгийг өрөнд төлж өгсөн боловч хожим нь буцаан нэхээд 1,500,000 төгрөгийг нь буцааж өгсөн бөгөөд нэхэмжлэлийг бүхэлд нь хүлээн зөвшөөрөхгүй гэж маргажээ. АНХАН ШАТ: Зээлийн гэрээний үүрэг үүсээгүй үндэслэлээр нэхэмжлэлийг бүхэлд нь хэрэгсэхгүй болгосон. ДАВЖ ЗААЛДАХ ШАТ: Анхан шатны шүүхийн шийдвэрийг өөрчлөн, хариуцагчаас 2,300,000 төгрөг гаргуулан нэхэмжлэгчид олгож, нэхэмжлэлийн 1,200,000 төгрөгт холбогдох хэсгийг хэрэгсэхгүй болгосон. Мөн улсын тэмдэгтийн хураамжийг тооцож шийдвэрлэжээ. ХЯНАЛТЫН ШАТ: Давж заалдах шатны шүүхийн магадлалыг хүчингүй болгож, анхан шатны шүүхийн шийдвэрийг хэвээр үлдээсэн. ҮНДЭСЛЭЛ: Зохигчдын хооронд зээлийн гэрээний үүрэг үүссэн нь нотлогдоогүй. Нэхэмжлэгч нь 5,200,000 төгрөгийг зээлсэнээ нотлоогүй, хариуцагч нь буцаан төлөх үүрэг хүлээсэн нь тогтоогдоогүй. Эрүүгийн хэрэгт бүрдүүлсэн баримтыг нэхэмжлэлийн үндэслэл болгосон нь буруу. Иргэний хэрэг шүүхэд хянан шийдвэрлэх тухай хуулийн дагуу зохигчид өөрсдийн шаардлага, татгалзлаа нотлох ёстой.