Тогтоол №26646

ХЭРГИЙН ТАНИЛЦУУЛГА: А ХХК нь Б-, В-, Г-, Д ХХК-д холбогдуулан 1,636,898,000 төгрөг гаргуулах тухай нэхэмжлэл гаргасан. Нэхэмжлэгч нь хариуцагч Б-тэй байгуулсан зээлийн гэрээний үүргийн гүйцэтгэлд шилжүүлсэн үл хөдлөх хөрөнгийн үнэлгээнд зөрүү үүссэн, улмаар үндэслэлгүй хөрөнгөжсөн гэж үзсэн. АНХАН ШАТ: Хариуцагч Б-ээс 542,313,340 төгрөгийг гаргуулж нэхэмжлэгч А ХХК-д олгох, нэхэмжлэлийн зарим хэсгийг хэрэгсэхгүй болгож, шинжээчийн зардлыг нэхэмжлэгчээс гаргуулж хариуцагч Б-д олгох, улсын тэмдэгтийн хураамжийг хуваарилах шийдвэрлэсэн. ДАВЖ ЗААЛДАХ ШАТ: Нэхэмжлэгч нь анхан шатны шүүхийн тогтоосон үнэлгээ, шинжээчийн зардлын хуваарилалтад гомдолтой. Хариуцагч нь анхан шатны шүүх хэргийг буруу тайлбарлаж шийдвэрлэсэн, талуудын хооронд үүрэг үүсээгүй гэж үзэж, нэхэмжлэлийн шаардлагыг бүхэлд нь хэрэгсэхгүй болгохыг хүссэн.

ҮНДЭСЛЭЛ: Давж заалдах шатны шүүхээс анхан шатны шүүхийн шийдвэрт өөрчлөлт оруулж, нэхэмжлэгчийн зээлийн гэрээний дагуу төлөх ёстой үүргийн хэмжээ, шилжүүлсэн үл хөдлөх хөрөнгийн үнэлгээний зөрүүг тооцон, хариуцагч Б-ээс 740,741,616 төгрөгийг гаргуулж нэхэмжлэгч А ХХК-д олгох, улсын тэмдэгтийн хураамж болон шинжээчийн зардлыг хуваарилахдаа зохигчдын гомдлыг хангасан. Зээлийн гэрээний үүргээс илүү үнэлгээ бүхий хөрөнгө шилжүүлсэн байх тул үүссэн зөрүүг үндэслэлгүй хөрөнгөжилт гэж үзсэн.