Тогтоол №1566

ХЭРГИЙН ТАНИЛЦУУЛГА: Хоёр шүүгдэгч нь согтууруулах ундаа хэрэглэсэн үедээ хохирогчтой маргалдаж, нэг нь хөнгөн, нөгөө нь хүндэвтэр хохирол учруулсан хэрэг. АНХАН ШАТ: Шүүгдэгч Ш.М-г хүний эрүүл мэндэд хөнгөн хохирол учруулсан, Л.Б-г хүндэвтэр хохирол учруулсан гэм буруутайд тооцож, Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар Ш.М-д 360 цаг, 11.4 дүгээр зүйлийн 1 дэх хэсэгт зааснаар Л.Б-д 690 цагийн нийтэд тустай ажил хийлгэх ял оногдуулсан. ДАВЖ ЗААЛДАХ ШАТ: Анхан шатны шүүхийн шийдвэрийг хэвээр үлдээж, шүүгдэгчдийн өмгөөлөгчийн гомдлыг хэрэгсэхгүй болгосон. ХЯНАЛТЫН ШАТ: Шүүгдэгчдийн өмгөөлөгчид хэргийн бодит байдал, хууль хэрэглээний талаар гомдол гаргасан. Ш.М-ын өмгөөлөгч хөөн хэлэлцэх хугацаа дууссан тул хэргийг хэрэгсэхгүй болгохыг, Л.Б-ын өмгөөлөгч хэргийн бодит байдал болон хууль хэрэглээ буруу байна гэж үзэж хэргийг хэрэгсэхгүй болгохыг хүссэн. Прокурор анх болон давж заалдах шатны шүүхийн дүгнэлтийг дэмжиж, гомдлыг хэрэгсэхгүй болгох саналтай байсан. ҮНДЭСЛЭЛ: Шүүгдэгчдийн үйлдсэн гэмт хэргүүд Эрүүгийн хуулийн ерөнхий ангийн 2.6 дугаар зүйлийн 2 дахь хэсэгт зааснаар хөнгөн гэмт хэрэгт хамаарах бөгөөд гэмт хэрэг үйлдэгдсэн өдрөөс хойш 1 жил өнгөрч, Эрүүгийн хуулийн 1.10 дугаар зүйлийн 1.1 дэх хэсэгт заасан хөөн хэлэлцэх хугацаа өнгөрсөн тул хэргийг хэрэгсэхгүй болгож, эрүүгийн хариуцлагаас чөлөөлөх нь зүйтэй гэж дүгнэн, анхан болон давж заалдах шатны шүүхийн шийтгэх тогтоол, магадлалд "Эрүүгийн хэрэг хянан шийдвэрлэх тухай хуулийн 34.19 дүгээр зүйлийн 1.2-т зааснаар Ш.М-, Л.Б- нарт холбогдох хэргийг хэрэгсэхгүй болгож, түүнийг эрүүгийн хариуцлагаас чөлөөлсүгэй" гэсэн нэмэлт заалт оруулж, шүүгдэгч Ш.М-ын өмгөөлөгчийн гомдлыг хүлээн авч шийдвэрлэсэн.