Тогтоол №8777

ХЭРГИЙН ТАНИЛЦУУЛГА: Хоёр этгээд согтуурсан үедээ бүлэглэн иргэний эрүүл мэндэд хөнгөн хохирол учруулсан хэрэг. АНХАН ШАТ: Хоёр этгээдийг Эрүүгийн хуулийн тусгай ангийн 11.6 дугаар зүйлийн 2 дахь хэсгийг ерөнхий ангийн 3.7 дугаар зүйлийн 1 дэх хэсэгт заасныг журамлан үйлдсэн гэм буруутайд тооцож, тус бүрийг 500,000 төгрөгөөр торгох ял оногдуулсан. ДАВЖ ЗААЛДАХ ШАТ: Прокурор анхан шатны шүүхийг Эрүүгийн хуулийг буруу хэрэглэсэн гэж үзэн эсэргүүцэл бичсэн. Анхан шатны шүүх гэм бурууг тогтоохдоо хохирол учруулсан үйлдлийн хүндрүүлэх нөхцөл болох "бүлэглэсэн"-д нэмж ерөнхий ангийн "бүлэглэн гүйцэтгэх"-ийг журамласан нь Эрүүгийн хуулийг буруу хэрэглэсэн гэж үзсэн. ҮНДЭСЛЭЛ: Гэмт хэргийн шинжийг тогтоохдоо тухайн хүндрүүлэх бүрэлдэхүүн Эрүүгийн хуулийн тусгай ангид багтсан байхад нэмж Ерөнхий ангийг журамласан нь хууль буруу хэрэглэсэнд тооцогдоно. Иймд анхан шатны шүүхийн шийдвэрт өөрчлөлт оруулж, ерөнхий ангийн 3.7 дугаар зүйлийн 1 дэх хэсгийг хасч, зөвхөн тусгай ангийн 11.6 дугаар зүйлийн 2 дахь хэсэгт зааснаар ял оногдуулсан.