Тогтоол №7653

ХЭРГИЙН ТАНИЛЦУУЛГА: Шүүгдэгч нь урьд таньдаг байсан хүний гар утасны итгэл урвуулан авч, буцаан өгөлгүй, эд хөрөнгөнд нь хохирол учруулсан гэмт хэрэгт холбогдсон. АНХАН ШАТ: Анхан шатны шүүхээс Эрүүгийн хуулийн тусгай ангийн 17.3 дугаар зүйлийн 1-р заалтаар гэм буруутайд тооцож, 6 сар хорих ял оногдуулж, урьд тэнссэн ялыг хүчингүй болгон нийт 1 жил 6 сарын хорих ял оногдуулсан. ДАВЖ ЗААЛДАХ ШАТ: Шүүгдэгч болон прокурор анхан шатны шүүхийн шийдвэрт давж заалдсан. Шүүгдэгч үйлдсэн хэргийн огнооны алдааг дурдаж, оногдуулсан ялыг хөнгөлөхийг хүссэн. Прокурор яллах дүгнэлтэнд гарсан бичгийн алдааг залруулаагүй, хэргийг бүрэн судлаагүй гэж үзэн шийтгэх тогтоолыг хүчингүй болгож, дахин хэлэлцүүлэхээр буцаалгах эсэргүүцэл бичсэн.

ҮНДЭСЛЭЛ: Давж заалдах шатны шүүхээс анхан шатны шүүх нь хэрэгт цугларсан нотлох баримтыг бүрэн судлаагүй, улсын яллагчийн гаргасан бичгийн алдааг залруулах саналыг хүлээн аваагүй, хэргийн жинхэнэ байдалтай нийцээгүй дүгнэлт хийж, шүүгдэгчийн эрх зүйн байдлыг дордуулсан гэж үзэв. Яллах дүгнэлтэнд гэмт хэрэг үйлдсэн огноог буруу бичсэн байсныг анхан шатны шүүх залруулаагүй нь ноцтой зөрчил болсон байна. Тиймээс анхан шатны шүүхийн шийтгэх тогтоолыг хүчингүй болгож, хэргийг дахин хэлэлцүүлэхээр шүүхийн урьдчилсан хэлэлцүүлэгт буцаахаар шийдвэрлэв.