Тогтоол №6946

ХЭРГИЙН ТАНИЛЦУУЛГА: Яллагдагч зам тавьж өгөөгүйгээс явган зорчигчид хүнд гэмтэл учруулсан хэрэг. АНХАН ШАТ: Яллагдагчийг Эрүүгийн хуулийн тусгай ангийн 27.10 дугаар зүйлийн 2 дахь хэсгийн 2.3-д зааснаар зүйлчлэн нэг жилийн хугацаагаар тэнсэж, албадлагын арга хэмжээ хэрэглэх санал гаргасан нь хялбаршуулсан журмаар хэрэг хянан шийдвэрлэх ажиллагааны зорилтод нийцэхгүй гэж үзэн, хэргийг нэмэлт мөрдөн шалгах ажиллагаа хийлгэхээр прокурорт буцаасан. ДАВЖ ЗААЛДАХ ШАТ: Прокурор анхан шатны шүүхийн захирамжийг эс зөвшөөрч, хялбаршуулсан журмаар хэрэг хянан шийдвэрлэх ажиллагааны талаарх хуулийн зохицуулалтыг буруу тайлбарласан гэж үзэн, захирамжийг хүчингүй болгож, хэргийг дахин хэлэлцүүлэхээр анхан шатны шүүхэд буцаалгах санал гаргасан. Гэвч давж заалдах шатны шүүх яллагдагчийн эрүүгийн хариуцлагын талаарх прокурорын санал Эрүүгийн хуулийн ерөнхий ангийн 6.7 дугаар зүйлд зааснаар хорих ял оногдуулахгүйгээр тэнсэх санал гаргах эрх прокурорт байхгүй, мөн хуулийг буруу тайлбарлан хэрэглэсэн гэж үзэн, анхан шатны шүүгчийн захирамжийг хэвээр үлдээж, прокурорын эсэргүүцлийг хэрэгсэхгүй болгосон.

ҮНДЭСЛЭЛ: Эрүүгийн хуулийн ерөнхий ангийн 6.7 дугаар зүйлд заасныг хэрэглэх эсэх нь шүүхийн бүрэн эрхэд хамаарна. Прокурор яллагдагчид оногдуулах эрүүгийн хариуцлагын төрөл, хэмжээний талаарх саналаа Эрүүгийн хуулийн ерөнхий ангийн 5.1 дүгээр зүйлийн 2 дахь хэсэгт заасан эрүүгийн хариуцлагын төрөл, мөн хуулийн 5.2 дугаар зүйлийн 1 дэх хэсэгт заасан ялын төрлийн хүрээнд гаргах ёстой. Хууль тогтоогч тэнсэх зохицуулалтыг Эрүүгийн хуульд заасан эрүүгийн хариуцлагын төрөлд хамааруулаагүй тул прокурор хорих ял оногдуулахгүйгээр тэнсэх санал гаргах эрхгүй.