Тогтоол №6661

ХЭРГИЙН ТАНИЛЦУУЛГА: Согтууруулах ундааны зүйл хэрэглэсэн үедээ хүнийг 3 удаа хутгалж, онц харгис хэрцгий аргаар алсан хэрэгт холбогдох шүүгдэгчийн үйлдэлд Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1-д заасан гэмт хэрэгт яллах дүгнэлт үйлдсэнтэй холбоотой маргаан. АНХАН ШАТ: Шүүгдэгчийг хүнийг алах гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 10.1 дүгээр зүйлийн 1-д зааснаар 10 жилийн хорих ял шийтгэж, хохирлыг гаргуулсан. ДАВЖ ЗААЛДАХ ШАТ: Хохирогчийн төлөөлөгч ялын хэмжээ хангалтгүй, гэмт хэргийн зүйлчлэл хөнгөрүүлсэн нь үндэслэлгүй, эрүүгийн хариуцлагын зорилго хангагдахгүй гэж гомдол гаргасан. Прокурор хэргийн бодит байдалтай нийцээгүй, гэмт хэргийн зүйлчлэлийг хөнгөрүүлэн өөрчилсөн нь ойлгомжгүй, хууль зүйн үндэслэлгүй, шүүх эрх хэмжээгээ хэтрүүлэн зэрэглэл тогтоосон үндэслэлээр анхан шатны шүүхийн шийтгэх тогтоолыг хүчингүй болгож, хэргийг дахин хэлэлцүүлэхээр буцаах эсэргүүцэл гаргасан.

ҮНДЭСЛЭЛ: Анхан шатны шүүхээс шүүгдэгчийг гэм буруутайд тооцсон үндэслэл, ял шийтгэл, гэмт хэргийн зүйлчлэл, мөн шүүхээс тогтоосон хэргийн баримт, нотлох баримтын үнэлгээ, улсын яллагчийн дүгнэлтүүдийн хооронд ойлгомжгүй, хууль зүйн үндэслэлгүй зөрчлүүд байсан тул давж заалдах шатны шүүх анхан шатны шүүхийн шийтгэх тогтоолыг хүчингүй болгож, хэргийг дахин хэлэлцүүлэхээр буцаахаар шийдвэрлэв.