Тогтоол №6016

ХЭРГИЙН ТАНИЛЦУУЛГА: Иргэн А.Б нь нэг удаагийн үйлдлээр иргэн Г.Амарбатын морийг хулгайлж, мөн моринд харьяалагдах нийт 2,550,000 төгрөгийн үнэтэй эмээл, суран хазаарыг хулгайлсан хэргээр холбогджээ. АНХАН ШАТ: Анхан шатны шүүхээс А.Б-г бусдын эд хөрөнгө хулгайлсан гэм буруутайд тооцож, Эрүүгийн хуулийн тусгай ангийн 17.1 дүгээр зүйлийн 1-д заасны дагуу 8 сарын хорих ялаар шийтгэсэн. Харин Эрүүгийн хуулийн тусгай ангийн 17.12 дугаар зүйлд заасан мал хулгайлах үйлдлийг хэрэгсэхгүй болгосон. ДАВЖ ЗААЛДАХ ШАТ: Прокурор нь анхан шатны шүүхийн шийдвэртэй эсэргүүцэл гаргаж, А.Б-гийн нэг удаагийн үйлдлээр мал болон эд хөрөнгө хулгайлсан байхад мал хулгайлах үйлдлийг хэрэгсэхгүй болгосон нь Эрүүгийн хуулийн ерөнхий ангийн 2.2 дугаар зүйлийн 4-ийг зөрчсөн үндэслэлгүй гэж үзэн, шийтгэх тогтоолыг хүчингүй болгож, хэргийг дахин хэлэлцүүлэхээр буцаах санал гаргасан. Давж заалдах шатны шүүхээс прокурорын эсэргүүцлийг хүлээн авч, анхан шатны шүүхээс мал хулгайлах үйлдлийг хэрэгсэхгүй болгохдоо яллах нотлох баримтыг үгүйсгэсэн үндэслэлээ тодорхой заалгүй шийдвэрлэсэн нь үндэслэлгүй тул шийтгэх тогтоолыг хүчингүй болгож, хэргийг дахин хэлэлцүүлэхээр анхан шатны шүүхэд буцаахаар шийдвэрлэсэн. ҮНДЭСЛЭЛ: Эрүүгийн хуулийг буруу хэрэглэсэн, Эрүүгийн хэрэг хянан шийдвэрлэх тухай хуулийг ноцтой зөрчсөн нь шүүхийн шийдвэрт нөлөөлсөн гэж үзвэл хэргийг дахин хэлэлцүүлэхээр буцаана.