Тогтоол №5152

ХЭРГИЙН ТАНИЛЦУУЛГА: Хууль сахиулагчийг албан үүргээ гүйцэтгэж байхад нь бие махбодид нь хохирол учруулсан хэрэг. АНХАН ШАТ: Нэг шүүгдэгчийг хүний эрүүл мэндэд хүндэвтэр хохирол санаатай учруулсан болон хууль сахиулагчийг албан үүргээ биелүүлэхтэй нь холбогдуулан хүч хэрэглэсэн гэмт хэрэг үйлдсэн гэм буруутайд тооцож, торгох ял оногдуулсан. Нөгөө шүүгдэгчийг хөнгөн хохирол учруулсан гэм буруутайд тооцсон боловч хөөн хэлэлцэх хугацаа дууссан үндэслэлээр хэргийг хэрэгсэхгүй болгож, эрүүгийн хариуцлагаас чөлөөлсөн. ДАВЖ ЗААЛДАХ ШАТ: Анхан шатны шүүхийн шийтгэх тогтоол нь Эрүүгийн хэрэг хянан шийдвэрлэх тухай хуулийн шаардлагыг хангаагүй, нотлох баримтыг бүрэн шалгаж тодруулаагүй, гэмт хэрэг гарсан байдлын талаар харилцан зөрүүтэй мэдүүлэг байхад аль нэгийг нь үгүйсгэсэн үндэслэлийг тогтоолоогүй, мөн шинэлэн найруулсан Эрүүгийн хуулийг буцаан хэрэглэх талаар үндэслэлтэй дүгнэлт хийх шаардлагатай гэж үзээд анхан шатны шүүхийн шийтгэх тогтоолыг хүчингүй болгож, хэргийг шүүхийн урьдчилсан хэлэлцүүлэг хийлгэхээр буцаасан.

ҮНДЭСЛЭЛ: Гэмт хэрэг гарсан нөхцөл байдлын талаар шүүгдэгчид харилцан зөрүүтэй мэдүүлэг өгсөн нь мөрдөн байцаалт хангалтгүй хийгдсэнийг илтгэсэн. Гэмтэл тогтоосон шинжээчийн дүгнэлт нь хэргийн бодит нөхцөл байдалтай холбогдуулан шалгагдаж тогтоогдоогүй. Хэргийн бодит байдлыг тодруулах, гэм буруугийн хэлбэрийг тогтоох, мөн 2002 оны Эрүүгийн хууль болон 2015 оны Эрүүгийн хуулийн хамаарлыг тогтоох зэрэг мөрдөн шалгах ажиллагааг бүрэн гүйцэд явуулах шаардлагатай.