Тогтоол №4981

ХЭРГИЙН ТАНИЛЦУУЛГА: Иргэний эд хөрөнгийг хулгайлсан гэмт хэрэгт холбогдсон шүүгдэгчийн ял шийтгэлтэй холбоотой асуудлаарх маргаан. АНХАН ШАТ: Хүн амьдрах орон байранд нэвтэрч эд хөрөнгийг хулгайлсан гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1-т зааснаар 2 жилийн хугацаагаар хорих ял оногдуулж, нээлттэй хорих ангид эдлүүлэхээр шийтгэсэн. ДАВЖ ЗААЛДАХ ШАТ: Прокурор ял хүндрүүлэх нөхцөл байдлыг буруу тайлбарлан хэрэглэснийг үндэслэн шийтгэх тогтоолд өөрчлөлт оруулахаар эсэргүүцэл бичсэн. Давж заалдах шатны шүүх прокурорын эсэргүүцлийг хангаж, анхан шатны шүүхийн шийтгэх тогтоолын тодорхойлох хэсэгт "урьд удаа дараа гэмт хэрэг болон зөрчлийн хэрэг үйлдэж байсан нь ял хүндрүүлэх нөхцөл байдал болно" гэсэн дүгнэлтийг хүчингүй болгож, тогтоох хэсгийг хэвээр үлдээсэн.

ҮНДЭСЛЭЛ: Эрүүгийн хуулийн ерөнхий ангийн 6.6 дугаар зүйлийн 3-т зааснаар шүүх хуульд заагаагүй нөхцөл байдлыг харгалзан эрүүгийн хариуцлагыг хүндрүүлэхийг хориглодог. Анхан шатны шүүх "урьд удаа дараа гэмт хэрэг болон зөрчлийн хэрэг үйлдэж байсан" гэх байдлыг ял хүндрүүлэх нөхцөл байдал болгон тооцсон нь дээрх хуулийн заалтыг зөрчсөн байна. Гэсэн хэдий ч тухайн гэмт хэргийн ялын хамгийн доод хэмжээг оногдуулсан тул ял шийтгэлийг хэвээр үлдээсэн.