Тогтоол №4627

ХЭРГИЙН ТАНИЛЦУУЛГА: Хууль бусаар хүн амьдрах орон байранд нэвтэрч, гар утас хулгайлсан хэргээр шүүгдэгчийг яллахад шалгах ажиллагаа дутуу хийгдсэн, хамтран гүйцэтгэгчдийг тогтоогоогүй, тэдний хувийн байдлыг тогтоолгоогүй байхад анхан шатны шүүх хэргийг прокурорт буцаасан нь Эрүүгийн хэрэг хянан шийдвэрлэх тухай хуулийг зөрчсөн гэж үзсэн. АНХАН ШАТ: Эрүүгийн хэрэг хянан шийдвэрлэх тухай хуулийн 33.1, 33.3 дугаар зүйлийг үндэслэн, гэмт хэрэг үйлдсэн байдлыг бүрэн тогтоох, хамтран гүйцэтгэгчдийг олж шалгах шаардлагатай гэсэн үндэслэлээр хэргийг прокурорт буцаасан. ДАВЖ ЗААЛДАХ ШАТ: Прокурор хэргийг прокурорт буцаасан анхан шатны шүүгчийн захирамжийг Эрүүгийн хэрэг хянан шийдвэрлэх тухай хуулийг буруу хэрэглэсэн хэмээн үзэж эсэргүүцэл гаргасан. Давж заалдах шатны шүүх прокурорын эсэргүүцлийг үндэслэлтэй гэж үзэн, анхан шатны шүүхийн хэргийг прокурорт буцаасан захирамжийг хүчингүй болгож, хэргийг анхан шатны шүүхэд дахин хэлэлцүүлэхээр буцаасан.

ҮНДЭСЛЭЛ: Анхан шатны шүүх нь гэм буруугийн асуудлыг хэлэлцэх явцад хэргийг прокурорт буцаасан нь Эрүүгийн хэрэг хянан шийдвэрлэх тухай хуулийн 34.1 дүгээр зүйлийг зөрчсөн. Мөрдөн шалгах ажиллагаа бүрэн хийгдсэн, шүүх хэргийн үйл баримтад хууль зүйн дүгнэлт хийж гэм буруугийн асуудлыг хянан шийдвэрлэх боломжтой байхад хамтран гүйцэтгэгчдийг шалгах шаардлагатай гэж үзсэн нь үндэслэлгүй. Шинэчлэн найруулсан Эрүүгийн хуульд ялтан шинээр гэмт хэрэг үйлдсэн тохиолдолд ялуудыг нэгтгэн жинхэнэ эдлэх ялыг тогтоох журам хуульчилсан боловч, тогтоол гарахын өмнө үйлдсэн гэмт хэрэг нь дараа нь илэрсэн тохиолдолд хэрхэх асуудлыг зохицуулаагүй орхигдуулсан тул холбогдох хэргүүдийг нэгтгэн нэг яллах дүгнэлтийн хүрээнд, нэг шүүх хуралдаанаар хэлэлцэж, нэг тогтоолоор шийдвэрлэхээс өөр аргагүй.